Abbosbek Fayzullayevning statistikasi, Jeki Chan Qozog‘istonda — kun yangiliklari
Abbosbek Fayzullayevning statistikasi, Jeki Chan Qozog‘istonda — kun yangiliklari Kursiv Uzbekistan dayjestida.
Faqat 2-3 foizi to‘lagan: pulli avtoturargoh haqini to‘lamaganlar jarimaga tortiladi
Toshkent shahar hokimligi tomonidan pulli yo‘l bo‘yi avtoturargohidan foydalanganlik uchun haq to‘lamagan haydovchilarga alohida jarima belgilanishi taklif qilindi. Ma’muriy javobgarlik to‘g‘risidagi kodeksga o‘zgartirish kiritishni nazarda tutuvchi qonun loyihasi jamoatchilik muhokamasiga joylashtirildi.
Loyihaga ko‘ra, kodeks «Yo‘l bo‘yidagi pulli to‘xtab turish joyidan foydalanganlik uchun haq to‘lamaslik» haqidagi yangi 128-11-modda bilan to‘ldiriladi. Belgilangan muddatda parking haqini to‘lamaslik yoki to‘lovdan bo‘yin tovlash ikki bazaviy hisoblash miqdorida jarimaga sabab bo‘ladi.
Yaxshi yoki yomon: Abbosbek Fayzullayevning statistikasi yangilandi
O‘zbekiston milliy terma jamoasi yarim himoyachisi Abbosbek Fayzullayev 2026-yilgi jahon chempionatida nafaqat hujumni tashkil qilish, balki himoyaviy harakatlarda ham faol ishtirok etdi. Bu haqda FOX Sports platformasida e’lon qilingan futbolchining turnirdagi statistik ma’lumotlarida qayd etilgan.
Fayzullayev mundialda O‘zbekiston terma jamoasining uchta uchrashuvida qatnashdi va ularning barchasini asosiy tarkibda boshladi. Yarim himoyachi maydonda jami 224 daqiqa harakat qildi.
Dollar tushdi: 15-iyul uchun valyutalar kursi e’lon qilindi
15-iyul uchun valyutalar kursi yangilandi. Unga ko‘ra, dollar kursi 27,38 so‘mga tushib, 12 065,49 so‘mni tashkil etdi. Bu narx Valyuta birjasida bo‘lib o‘tgan savdolar asosida shakllantirildi.
Markaziy bank ma’lumotlariga ko‘ra, yevro 69,91 so‘mga tushib, 13 754,66 so‘mni, rubl esa 1,47 so‘mga tushib, 155,66 so‘mni tashkil etdi.
Samsung yetakchi: oxirgi 3 oyda eng ko‘p sotilgan smartfon brendlari
2026-yilning ikkinchi choragida global smartfon yetkazib berish hajmi yillik hisobda 11 foizga kamaydi. Counterpoint Research hisob-kitoblariga ko‘ra, bu 2013-yildan beri ikkinchi chorak uchun eng past natija bo‘ldi.
Bozor pasayishining asosiy sababi DRAM va NAND xotira chiplarining qimmatlashishi bo‘ldi. Xotira ishlab chiqaruvchilari sun’iy intellekt ma’lumotlar markazlariga ustuvorlik bergani sabab smartfon ishlab chiqaruvchilari uchun komponentlar narxi oshdi. Natijada arzon va o‘rta narx segmentidagi qurilmalar qimmatlashdi.
Jeki Chan Qozog‘istonda yangi film suratga olishni boshlamoqda
Mashhur aktyor, rejissyor va jang san’ati ustasi Jeki Chan yangi xalqaro film suratga olish uchun Qozog‘istonning Mang‘istov viloyatiga bordi. U «Xudoning zirhi 4: Ultimatum» filmida ishtirok etadi.
Filmning muhim sahnalari dunyoga mashhur Bo‘zjira darasida suratga olinadi. Mang‘istov viloyati hokimligi fikricha, hududning tanlanishi jahon kino sanoatining Qozog‘iston tabiiy manzaralariga qiziqishi ortayotganini ko‘rsatadi.
Food City’da muz savdosi uchun oshirilgan yig‘im bekor qilindi
Raqobat qo‘mitasi Food City Tashkent hududida muz mahsulotlari savdosi uchun bir kunlik 737 ming so‘mlik yig‘im bekor qilinganini bildirdi. To‘lov tadbirkor murojaati asosida o‘rganilgan.
Food City Tashkent hududida muz mahsulotlari sotuvchi tadbirkor bozor ma’muriyati sun’iy to‘siqlar yaratayotganini bildirgan. Uning aytishicha, bozor hududiga qadoqlangan va qadoqlanmagan muz olib kirish uchun to‘lov bir necha barobar oshirilib, kuniga 737 ming so‘m etib belgilangan.
Toshkentda qayerda cho‘milish mumkin: eng yaxshi akvaparklar va basseynlar
Toshkentda iyul oyi haqiqiy jazirama mavsumi bo‘lib, harorat ko‘pincha +40°C dan oshadi. Dam olish kunlarini yoki ishdan keyingi oqshomni o‘tkazishning eng yaxshi usullaridan biri – akvapark yoki basseynga borish. Shaharda va uning atrofida ko‘plab majmualar mavjud: oilaviy akvaparklardan tortib, dam olish uchun ochiq basseynlargacha.
Navoiyda ham ayrim davlat bog‘chalari vaqtincha yopiladi
Navoiy viloyatida kuzatilayotgan anomal issiq tufayli ayrim davlat maktabgacha ta’lim tashkilotlari faoliyati vaqtincha to‘xtatiladi. Bu haqda Navoiy viloyati Maktabgacha va maktab ta’limi boshqarmasi ma’lum qildi.
Joriy hafta davomida viloyatda havo harorati 44–45°C gacha ko‘tarilishi kutilmoqda. Shu munosabat bilan tuman (shahar) hokimlarining farmoyishlariga asosan ayrim hududlardagi davlat maktabgacha ta’lim tashkilotlari faoliyati vaqtincha to‘xtatiladi.
Voyaga yetmaganlarni emansipatsiya qilish tartibi yangilandi
Voyaga yetmagan shaxsni to‘la muomalaga layoqatli deb e’lon qilish bo‘yicha davlat xizmatini ko‘rsatishning yangi tartibi tasdiqlandi. Bu haqda Adliya vazirligi ma’lum qildi.
Hukumat qarori bilan «Voyaga yetmagan shaxsni to‘la muomalaga layoqatli deb e’lon qilish (emansipatsiya) bo‘yicha davlat xizmatini ko‘rsatish»ning ma’muriy reglamenti tasdiqlandi.
Banklar mikroqarz sug‘urtasi bo‘yicha mijozlarga ochiq ma’lumot berishi shart — MB
Ijtimoiy tarmoqlarda onlayn mikroqarzlar ajratish jarayonida sug‘urta mukofoti mijoz hisobidan yoki kredit mablag‘i hisobidan ushlab qolinishi, biroq kredit muddatidan oldin to‘liq so‘ndirilganda sug‘urta shartnomasining foydalanilmagan davri uchun sug‘urta mukofotining tegishli qismi qaytarilmasligi yoki uni qaytarish tartibi yetarlicha sodda va tushunarli emasligi haqida xabarlar tarqaldi.
Shu munosabat bilan onlayn mikroqarzlar va boshqa chakana kredit mahsulotlari bilan birga sug‘urta mahsulotlarini taklif qilayotgan tijorat banklariga mazkur masala bo‘yicha o‘z pozitsiyasini rasmiy kommunikatsiya kanallarida e’lon qilish tavsiya etildi. Banklar rasmiy veb-sayti, mobil ilovasi, ijtimoiy tarmoqlardagi sahifalari va boshqa axborot kanallari orqali iste’molchilarga aniq va tushunarli ma’lumot taqdim etishi lozim.
