Sadir Japarov qizining bolalarga sovg‘a tarqatganiga izoh berdi
Qirg‘iziston prezidenti Sadir Japarov qizi Janayimning «Altin balalik» reabilitatsiya markazida bolalarga sovg‘a tarqatgani aks etgan video yuzasidan izoh berdi. U bu tadbir siyosiy reklama yoki qizini siyosatga olib kirish bilan bog‘liq emasligini aytdi.
Japarovning so‘zlariga ko‘ra, u farzandlari va yaqinlarini siyosat hamda davlat ishlariga aralashtirmaydi. Prezident qizining markazga borishini ham siyosiy maqsad bilan bog‘lash noto‘g‘ri ekanini ta’kidladi.
Sovg‘alarni aslida prezidentning rafiqasi topshirishi kerak edi
«Altin balalik» markazida har yili mamlakatning turli hududlaridan, asosan, kam ta’minlangan oilalarning bolalari dam oladi va sog‘lomlashtirish muolajalaridan o‘tadi.
Japarovning aytishicha, uning rafiqasi Aygul Japarova bolalarga har yili sovg‘alar yuboradi. Bu safar u markazga shaxsan borishi kerak bo‘lgan, biroq rejalar o‘zgargach, sovg‘alarni qizi Janayim orqali yuborgan.
Bolalarga kiyimlar tarqatilgan
Janayim markazdagi bolalarga shortik hamda futbolkalar topshirgan va shundan so‘ng u yerdan ketgan. Prezident tadbir maxsus ommaga ko‘rsatish uchun tashkil qilinmaganini ham qayd etdi.
Japarovning so‘zlariga ko‘ra, tadbirga jurnalistlar taklif qilinmagan va sovg‘a topshirish jarayonini ommaga tarqatish rejalashtirilmagan.
U yerda bo‘lganlardan biri voqeani telefonga olib, videoni ijtimoiy tarmoqqa joylagan. Prezident bu holatdan siyosiy ma’no izlamaslik kerakligini aytdi.
Eslatib o‘tamiz, avvalroq Qirg‘izistonda sobiq Milliy xavfsizlik davlat qo‘mitasi raisi Qamchibek Tashiyev va boshqa sobiq yuqori lavozimli amaldorlarga oid ish bo‘yicha sud jarayoni yana yopiq tartibda o‘tkazilishi mumkinligi xabar qilingandi.
Hozirda ish Bishkek shahridagi Pervomay tuman sudida ochiq tartibda ko‘rilmoqda. Sud majlisi davomida raislik qiluvchi sudya Aziret Mederov sud zaliga kirishda qiyinchilik yuzaga kelganidan norozi bo‘ldi. Bunga sud binosida ommaviy axborot vositalari vakillarining ko‘pligi sabab bo‘lgan.
