O‘zbekistonda favqulodda vaziyatlar 28 foizga kamaydi

2026-yilning birinchi yarmida O‘zbekistonda favqulodda vaziyatlar soni o‘tgan yilning mos davriga nisbatan 28 foizga kamaydi. Yong‘inlar sonida ham pasayish qayd etilib, ko‘rsatkich 12 foizga qisqardi.

Favqulodda vaziyatlarda jabrlanganlar kamaydi

Favqulodda vaziyatlar vazirligi ma’lumotiga ko‘ra, 2026-yilning dastlabki olti oyida favqulodda vaziyatlar oqibatida tan jarohati olganlar soni 50 foizga kamaygan.

Shuningdek, bunday holatlar oqibatida halok bo‘lganlar soni 10 foizga qisqargan.

Yong‘inlar soni ham pasaydi

Hisobot davrida yong‘inlar soni 2025-yilning birinchi yarmiga nisbatan 12 foizga kamaydi.

Yong‘inlar oqibatida tan jarohati olganlar soni 38 foizga, halok bo‘lganlar soni esa 15 foizga kamaygan.

Qaysi obyektlarda yong‘inlar kamaygan

FVV ma’lumotiga ko‘ra, yong‘inlar aholi yashash joylari, materiallar ochiq saqlanadigan hududlar, qishloq xo‘jaligi obyektlari, inshoot va qurilmalarda kamaygan.

Shuningdek, madaniy-tomosha, davolash hamda ma’muriy-jamoat muassasalarida ham yong‘inlar soni qisqargan.

Eslatib o‘tamiz, avvalroq Sirdaryo viloyati markazi Guliston shahrida avtomashina yuvish shoxobchasi va undagi Cobalt avtomobilida yong‘in sodir bo‘lgandi.