O‘zbekiston sun’iy intellekt bo‘yicha yangi xalqaro tashkilotning ta’sischilaridan bo‘ldi

Shanxay shahrida sun’iy intellekt sohasida hamkorlik bo‘yicha Butunjahon tashkiloti (WAICO) tuzildi. O‘zbekiston qariyb 30 ta davlat qatorida ushbu xalqaro tuzilmaning hamta’sischilaridan biriga aylandi. Bu haqda Raqamli texnologiyalar vazirligi xabar berdi.

Bitimga 30 ga yaqin davlat qo‘shildi

Tashkilotni ta’sis etish to‘g‘risidagi bitim 2026-yilgi Butunjahon sun’iy intellekt konferensiyasi arafasida imzolandi. O‘zbekiston nomidan hujjatga raqamli texnologiyalar vaziri Sherzod Shermatov imzo chekdi.

Tashkilotning asosiy maqsadi

WAICO sun’iy intellekt sohasida xalqaro hamkorlikni rivojlantirish, ilg‘or texnologiyalar almashinuvini yo‘lga qo‘yish hamda sun’iy intellektdan xavfsiz va mas’uliyatli foydalanish bo‘yicha umumiy yondashuvlarni ishlab chiqishni maqsad qilgan.

O‘zbekiston uchun qanday imkoniyatlar yaratadi

Raqamli texnologiyalar vazirligi ma’lumotiga ko‘ra, tashkilotning hamta’sischisiga aylanish O‘zbekistonning sun’iy intellekt sohasidagi xalqaro hamkorligini kengaytirish, ilg‘or tajribalarni jalb qilish va mamlakatning global sun’iy intellekt ekotizimidagi o‘rnini mustahkamlashga xizmat qiladi.

Bosh qarorgoh Shanxayda joylashadi

Yangi tashkilotning bosh qarorgohi Xitoyning Shanxay shahrida faoliyat yuritadi. 17–20-iyul kunlari o‘tayotgan Butunjahon sun’iy intellekt konferensiyasining bosh mavzusi esa «Intellektual hamkorlar — kelajakni birgalikda yaratish» etib belgilangan.

Avvalroq Kursiv Uzbekistan Apple SI chip ishlab chiqaruvchilarini nega sotib olmoqchiligi haqida yozgandi.