AQSh va Eron o‘zaro zarbalarni kuchaytirdi — video
AQSh Iordaniyada ikki amerikalik harbiy halok bo‘lganidan keyin Eronga navbatdagi havo zarbalarini berdi. Eron esa mintaqadagi AQSh ittifoqchilari obyektlariga zarba berganini bildirmoqda. Bu haqda BBC xabar berdi.
AQSh Markaziy qo‘mondonligi Erondagi qirg‘oq kuzatuv tizimlari, havo mudofaasi obyektlari hamda Islom inqilobi qo‘riqchilari korpusi bilan bog‘liq nishonlarga zarba berilganini ma’lum qildi.
AQSh harbiylariga ko‘ra, bu hujumlar Eronning Hormuz bo‘g‘ozidagi tijoriy kemalarga tahdid qilish imkoniyatini kamaytirish va Iordaniyadagi amerikalik harbiylarga qilingan hujumga javob sifatida amalga oshirilgan.
Eron atom elektr stansiyasi urilganini bildirdi
Eron OAVlariga ko‘ra, zarbalar mamlakat janubi-g‘arbidagi Darxoveyn shahrida qurilayotgan atom elektr stansiyasi va Hormuz bo‘g‘ozidagi Qeshm oroliga ham tegishli bo‘lgan.
AQSh esa zarbalar faqat harbiy nishonlarga, jumladan harbiy logistika infratuzilmasiga qaratilganini bildirgan.
Eron ham javob zarbalari berdi
Eron tomoni Quvaytdagi AQSh kuchlari foydalanadigan aviabaza va omborga zarba berganini ma’lum qildi.
Quvayt rasmiylari esa ikki kun ichida ikkinchi bor elektr va suv chuchuklashtirish zavodi hujumga uchraganini bildirdi. Hujum oqibatida yong‘in chiqqan. Bahrayn ham havo mudofaasi hujumni qaytarganini ma’lum qildi.
Hormuz bo‘g‘ozi atrofida vaziyat keskinlashdi
AQSh Eron portlariga nisbatan blokadani qayta tiklagan, Tehron esa Hormuz bo‘g‘ozini yopiq deb e’lon qilgan.
Eron Islom inqilobi qo‘riqchilari korpusi ikki kema ogohlantirishlarga qaramay bo‘g‘ozdan o‘tishga uringani va «hodisaga» uchraganini bildirdi. Korpus AQSh ta’siridagi va xavfsiz bo‘lmagan yo‘nalishlardan foydalanadigan kemalar xavfga duch kelishini aytdi.
Tomonlar bir-birini kelishuvni buzishda ayblamoqda
AQSh va Eron o‘rtasidagi dastlabki sulh iyun oyida kelishilgan edi. Biroq kelishuv bir necha hafta ichida izdan chiqdi va Donald Tramp 8-iyul kuni uni «tugagan» deb e’lon qildi.
Eron oliy rahbari Mujtaba Xomanaiy AQShni kelishuvni takroran buzishda ayblab, Amerika prezidentining imzosi ishonchli emasligini aytdi.
Qurbonlar soni oshmoqda
Iordaniyadagi hujumdan keyin AQSh tomonida halok bo‘lgan harbiylar soni oshdi. Avvalroq bedarak yo‘qolgan amerikalik dengiz floti uchuvchisi ham vafot etgan deb e’lon qilindi.
Eron Sog‘liqni saqlash vazirligiga ko‘ra, so‘nggi uch hafta ichida AQSh zarbalari oqibatida kamida 50 kishi halok bo‘lgan, 500 dan ortiq odam jarohatlangan.
Eslatib o‘tamiz, avvalroq Vashington Eron hududidagi harbiy obyektlarga hujum qilganini bildirgan, Tehron esa AQShning Fors ko‘rfazi mamlakatlari va Iordaniyadagi harbiy infratuzilmasini nishonga olganini bildirgandi.
