Apple Yaponiyadagi rasmiy do‘konida iPhone smartfonlari narxlarini oshirdi. Bu haqda rozetked nashri xabar berdi.
Kompaniya avval boshqa mahsulotlar narxini ko‘targan bo‘lsa-da, iPhone modellari shu paytgacha eski narxlarda sotilayotgan edi.
Narxlar qanday o‘zgardi
Yangi narxlar taxminan quyidagicha:
| Model | Eski narx | Yangi narx | O‘sish |
|---|---|---|---|
| iPhone 17 Pro Max (256 GB) | $1 300 | $1 430 | 10% |
| iPhone 17 Pro (256 GB) | $1 200 | $1 300 | 8% |
| iPhone Air (256 GB) | $1 070 | $1 190 | 11% |
| iPhone 17e (256 GB) | $670 | $720 | 8% |
| iPhone 17 (256 GB) | $870 | $950 | 10% |
| iPhone 16 (128 GB) | $770 | $840 | 9% |
Sabab rasman ochiqlanmadi
Apple narxlar oshirilishining aniq sababini izohlamadi. Mutaxassislar bunga iyena kursining AQSh dollariga nisbatan zaiflashuvi hamda ishlab chiqarish xarajatlarining oshishi ta’sir qilgan bo‘lishi mumkinligini aytmoqda.
Boshqa bozorlarda narxlar o‘zgarmadi
Hozircha boshqa mamlakatlarda iPhone narxlari o‘zgarishsiz qolmoqda. Biroq sentabr oyida taqdim etilishi kutilayotgan iPhone 18 smartfonlari jahon bozorida ham qimmatroq narxda sotuvga chiqishi mumkinligi taxmin qilinmoqda.
Avvalroq Kursiv Uzbekistan Apple kutilmaganda iPhone 17 ishlab chiqarish hajmini qisqartirgani haqida yozgandi.
