Chevrolet Damas avtomobili uchun 100 ming kilometr masofa jiddiy chegara hisoblanmaydi, biroq aynan shu davrga kelib uning asosiy qismlarida tabiiy eskirish belgilari ko‘rina boshlaydi. Bu haqda avtomobil eksperti Komil Sulaymonov Kursiv Uzbekistan’ga ma’lum qildi.
Ekspertning so‘zlariga ko‘ra, avvalo avtomobilning osma tizimini tekshirish lozim. 100 ming kilometrdan keyin ustunlar va vtulkalarda (qisma) taqillash, rul uchliklarida bo‘shliq hamda g‘ildirak gupchagi podshipniklarining eskirishi kuzatilishi mumkin.
Nimalar qilish kerak
Shuningdek, 0,8 litrli dvigatelga muntazam texnik xizmat ko‘rsatish muhim. Moy o‘z vaqtida almashtirilmasa, moy sarfi ortishi, karbyurator ifloslanishi, dvigatelning bo‘sh holatda notekis ishlashi va tortish kuchining pasayishi ehtimoli mavjud. Qizib ketishning oldini olish uchun klapanlarni muntazam sozlash va sovitish tizimi holatini kuzatib borish tavsiya etiladi.
Vaqt o‘tishi bilan ilashish muftasi ham e’tibor talab qilishi mumkin. Avtomobil doimiy ravishda katta yuk bilan ishlatilsa, muftaning xizmat muddati qisqaradi va uzatmalar avvalgidek aniq ulanmay qoladi. Yuk tashishda ko‘p foydalaniladigan Damas’larda ressorlar, amortizatorlar hamda osmaning rezina-metall qismlari ham tezroq eskiradi.
Nosozliklar sabablari
Mutaxassisning qayd etishicha, 100 ming kilometrdan keyin yuzaga keladigan aksariyat nosozliklar avtomobilning konstruktiv kamchiliklari bilan emas, balki undan intensiv foydalanish va me’yoridan ortiq yuk tashish bilan bog‘liq.
Moyni o‘z vaqtida almashtirish, klapanlarni sozlash va osma tizimiga muntazam xizmat ko‘rsatish orqali Damas jiddiy muammolarsiz 200 ming kilometrdan ham ortiq masofa bosishi mumkin.
Avvalroq Kursiv Uzbekistan nashri yangi Chevrolet Onix Activ 2027 test-drayv qilingani haqida yozgan edi.
