Redmi Note 17 Pro Max 5G smartfonining global versiyasi Tailandning NBTC sertifikatlash bazasida paydo bo‘ldi. Bu haqda Gizmochina nashri xabar bermoqda.
Regulyator hujjatlarida 26081RA18G va 2609FRA74G indekslariga ega ikkita qurilma qayd etilgan. Ularning tijoriy nomlari Redmi Note 17 5G va Redmi Note 17 Pro Max 5G ekani tasdiqlandi. Biroq sertifikatlash materiallarida smartfonlarning texnik xususiyatlari, dizayni va taqdimot sanasi ochiqlanmagan.
Yangi modelning o‘ziga xos jihati shundaki, Xiaomi avvalroq Xitoyda Redmi Note 17 va Redmi Note 17 Pro smartfonlarini namoyish etgan, ammo mahalliy bozor uchun Pro Max versiyasini chiqarmagan. Shu sababli Redmi Note 17 Pro Max dastlab global bozorda paydo bo‘ladigan alohida model bo‘lishi mumkin.
NBTC sertifikati odatda qurilmaning rasmiy taqdimoti va sotuvga chiqarilishi yaqinlashayotganini anglatadi. Redmi Note 17 Pro Max 5G’ning protsessori, kamerasi, batareyasi, quvvatlash tezligi va narxi haqidagi batafsil ma’lumotlar hozircha e’lon qilinmagan.
Brend haqida
Redmi – Xitoyning Xiaomi korporatsiyasiga tegishli iste’mol elektronikasi brendi. U 2013-yilda hamyonbop smartfonlar turkumi sifatida tashkil etilgan, 2019-yil yanvaridan esa Xiaomi tarkibidagi mustaqil brendga aylantirilgan. Kompaniya o‘sha paytda Xiaomi nomi ostidagi qurilmalarni ilg‘or texnologiyalar hamda o‘rta va yuqori narx segmentlariga yo‘naltirish, Redmi’ni esa narx va texnik imkoniyatlar o‘rtasidagi maqbul nisbatga urg‘u beradigan ommaviy brend sifatida rivojlantirish strategiyasini belgilagan.
Redmi smartfonlari, asosan, boshlang‘ich va o‘rta narx segmentlarida sotiladi. Redmi Note turkumi kattaroq ekran, kuchliroq kamera, tezkor quvvatlash va unumdor protsessorlarni nisbatan qulay narxda taklif etishga qaratilgan. Brendning asosiy Redmi turkumi esa kundalik foydalanish uchun mo‘ljallangan yanada arzon qurilmalarni qamrab oladi. Xiaomi yillar davomida Redmi’ni yangi texnologiyalarni keng iste’molchilar uchun ochiq qilishga xizmat qiladigan brend sifatida ta’riflab kelmoqda.
Avvalroq «Kursiv» Redmi Note 17 taqdim etilgani haqida yozgan edi.
