Ispaniya va Argentina terma jamoalari o‘rtasidagi 2026-yilgi futbol bo‘yicha jahon chempionati finalini AQShda 62,8 mln nafardan ortiq tomoshabin kuzatdi. Bu haqda Axios xabar bermoqda.
Final uchrashuvida Ispaniya amaldagi jahon chempioni Argentinani qo‘shimcha vaqtda 1:0 hisobida mag‘lub etdi. O‘yinda Lionel Messi va Lamin Yamalning qarama-qarshiligi ham tomoshabinlar e’tiborini tortgan asosiy voqealardan biri bo‘ldi.
Nielsen ma’lumotlariga ko‘ra, uchrashuvning ingliz tilidagi translyatsiyasini Fox telekanalida qariyb 39 mln kishi tomosha qilgan. Bu 2022-yilgi jahon chempionati finalining Fox’dagi auditoriyasiga nisbatan 132 foizga ko‘p.
Raqamlar nima deydi
Telemundo orqali ispan tilidagi translyatsiyani esa qariyb 24 mln amerikalik kuzatdi. Ko‘rsatkich 2022-yilgi finalga nisbatan 166 foizga oshib, AQShdagi ispan tilidagi sport televideniyesi tarixida yangi rekord o‘rnatdi.
Turnir davomida striming xizmatlari ham auditoriyaning keskin oshishiga katta hissa qo‘shdi. Antenna hisob-kitoblariga ko‘ra, Fox One iyun oyida 2,8 mln yangi obunachi jalb qilgan. Bu xizmatning yanvar oyida, Amerika futboli pley-offlari davrida qayd etilgan avvalgi oylik rekordidan 2,5 barobar yuqori. Yangi obunachilarning 93 foizi Fox One’dan ilgari foydalanmagan mijozlar bo‘lgan.
Telemundo o‘yinlarini namoyish etgan Peacock platformasida ham iyun oyida 3,75 mln yangi obuna rasmiylashtirilgan. Telemundo ma’lumotiga ko‘ra, jahon chempionati auditoriyasining qariyb yarmi striming orqali shakllangan. 2022-yilgi turnirda ushbu ko‘rsatkich 30 foizni tashkil etgan edi.
Avvalroq «Kursiv» FIFA JCh – 2026 dan $15 mlrd daromad olgani haqida yozgan edi.
