Chevrolet Blazer 2026-yilgi modellar orasida sug‘urtalash eng arzon bo‘lgan krossoverlardan biri deb topildi. Mercury Insurance tadqiqotiga ko‘ra, ushbu Chevrolet modeli yangi SUVlar reytingida ikkinchi o‘rinni egalladi.
Blazer reytingda ikkinchi bo‘ldi
Mercury Insurance har yili sug‘urtasi eng arzon bo‘lgan yangi SUVlar ro‘yxatini tuzadi. 2026-yilgi reytingda Chevrolet Blazer Hyundai Santa Fe’dan keyin ikkinchi o‘rinni oldi, deya xabar berdi GM Authority.
Kuchli beshlikka, shuningdek, Honda Pilot, Kia Sportage va Honda Passport modellari kirdi. Ro‘yxatda Ford Escape, Kia Soul, Honda HR-V, Honda CR-V va Kia Sorento ham bor.
Sug‘urta xarajati avtomobil tanlashda muhim
Mercury Insurance’ga ko‘ra, sug‘urta to‘lovi avtomobil egasi mashinadan foydalangan butun davr davomida to‘lab boradigan xarajatlardan biri. Shu sabab yangi avtomobil xarid qilishda nafaqat narx, yoqilg‘i sarfi yoki servis xarajatlari, balki sug‘urta qiymati ham hisobga olinishi kerak.
Kompaniya sug‘urta narxiga bir nechta omillar ta’sir qilishini bildiradi. Ular orasida ta’mirlash xarajatlari, ehtiyot qismlar narxi, o‘g‘irlik statistikasi, xavfsizlik texnologiyalari va sug‘urta da’volari tarixi bor.
Xariddan oldin sug‘urta narxini bilish tavsiya qilindi
Mercury Insurance tadqiqot va ishlanmalar bo‘limi direktori Chong Gao’ning aytishicha, xaridorlar ko‘pincha avtomobil tanlashda sug‘urta xarajatiga yetarlicha e’tibor bermaydi.
Uning fikricha, mashina sotib olishdan oldin sug‘urta bo‘yicha taklif olish avtomobilga egalik qilishning umumiy xarajatini yaxshiroq tushunishga yordam beradi.
Blazer ikki xil dvigatel bilan taklif etiladi
Chevrolet Blazer GM C1 platformasida ishlab chiqariladi. Krossover ikki xil dvigatel bilan taklif etiladi: 2,0 litrli turbo benzin dvigatel va 3,6 litrli atmosferali V6 motor.
Model Meksikadagi GM Ramos Arizpe zavodida ishlab chiqariladi.
Eslatib o‘tamiz, avvalroq Chevrolet kompaniyasi qimmat avtomobil ustida ishlayotgani haqida xabar berilgandi. Zavod ichida 9BXX-2 indeksi bilan yuritilayotgan model kompaniya qatorida Trailblazer va Tracker oralig‘idan joy olishi kutilmoqda.
