ADM kompaniyalar guruhi, Hyundai va FINCOM qo‘shma korxonani ishga tushirdi

ADM kompaniyalar guruhi, Hyundai Corporation Singapore va FINCOM lizing kompaniyasi O‘zbekistonda avtomobillarni xarid qilish uchun moliyaviy imkoniyatlarni kengaytirishga qaratilgan qo‘shma korxonani ishga tushirdi. Loyihaning 3-avgustda boshlangan birinchi bosqichida qariyb $40 mln investitsiya kiritilishi rejalashtirilgan.

Hamkorlar kelgusi besh yil ichida investitsiyalar va lizing portfeli hajmini $100 mlngacha yetkazishni mo‘ljallamoqda. Yangi loyiha aholiga avtomobil xarid qilish uchun yanada moslashuvchan moliyalashtirish vositalarini taqdim etishi, shuningdek, O‘zbekiston avtomobilsozlik sanoati rivojiga qo‘shimcha turtki berishi kutilmoqda.

Qo‘shma korxonani tashkil etish to‘g‘risidagi kelishuv Toshkent xalqaro investitsiya forumi doirasida imzolangan. Hamkorlik xalqaro moliyaviy tajriba, zamonaviy lizing yechimlari va O‘zbekistondagi yirik avtomobil ekotizimini birlashtiradi.

Yangi loyiha qanday ishlaydi

«Har bir tomon loyihaga o‘z ekspertizasi va resurslarini kiritadi. Hyundai Corporation xalqaro moliyaviy vositalar, global tajriba va korporativ boshqaruvning eng yaxshi amaliyotlaridan foydalanish imkoniyatini ta’minlaydi. FINCOM lizing mahsulotlarini ishlab chiqish, operatsion boshqaruv va mijozlarga xizmat ko‘rsatishni rivojlantirish uchun mas’ul bo‘ladi. ADM O‘zbekistondagi eng yirik avtomobil dilerlik tarmog‘i, ishlab chiqarish va tarqatish quvvatlari, shuningdek, keng mijozlar bazasiga kirish imkonini beradi», — deydi FINCOM hammuassisi Stanislav Kim.

Hamkorlikning dastlabki bosqichida yangi lizing dasturlari O‘zbekistonda ishlab chiqariladigan va ADM dilerlik tarmog‘i orqali sotiladigan Kia avtomobillariga tatbiq etiladi. Keyinchalik mahsulotlar qatorini CHERY, HAVAL, TANK, Changan hamda Hyundai Truck & Bus avtomobillari hisobiga kengaytirish rejalashtirilgan.

Qo‘shma korxona kelgusida transport va maxsus texnika lizingini rivojlantirish, tijorat ko‘chmas mulkini xarid qilish hamda korporativ mijozlar uchun moliyaviy yechimlarni joriy etishni ham ko‘zda tutmoqda.

ADM kompaniyalar guruhining O‘zbekiston bo‘ylab 90 dan ortiq rasmiy dilerlik markazi mavjud. Hyundai Corporation xalqaro savdo va sanoat loyihalarida faoliyat yuritadi. FINCOM esa mamlakatda tuzilgan bitimlar soni bo‘yicha yetakchi beshta lizing kompaniyasi qatoriga kiradi va 12 ta bo‘linmadan iborat filiallar tarmog‘iga ega.

Avvalroq «Kursiv» nashri Kia kompaniyasi O‘zbekistonda ishlab chiqarishni kengaytirishi haqida yozgan edi.