Smart kompaniyasi yangi Smart #2 shahar elektromobilining 2026-yil oktabr oyiga rejalashtirilgan global taqdimoti oldidan noodatiy reklama kampaniyasini boshladi. Bu haqda CarNewsChina nashri xabar bermoqda.
Dizayn
Kompaniya yangi elektromobil dizaynining dastlabki ko‘rinishini an’anaviy reklama o‘rniga ko‘cha san’ati orqali namoyish etishga qaror qildi. Smart marketing bo‘limi rahbari Kan Iyning ta’kidlashicha, devoriy suratlar brendning eng taniqli ixcham modeli qaytishiga qiziqishni oshirishi kerak.
Shanxaydagi suratni zamonaviy rassom Chju Bin, Gonkongdagi tasvirni esa Parents Parents nomli ko‘cha san’ati jamoasi yaratdi. Buenos-Ayresdagi loyiha Martin Ron, Melburndagi devoriy surat esa Jorjiya Lori tomonidan ishlangan.
Model qanday ko‘rinishga ega
Melburndagi tasvir Smart #2 elektromobilining seriyali ko‘rinishi haqida ayrim tafsilotlarni ochib beradi. Avtomobil qoraytirilgan ustunlar va tom, odatiy eshik tutqichlari hamda ixcham faralarga ega bo‘ladi. Old bamperda to‘rtburchak havo kirish qismi atrofida ikkita havo kanali joylashtirilgan. Model sakkiz spitsali g‘ildirak disklari bilan jihozlanadi.
Smart #2 dizayni Mercedes-Benz Global Design Team jamoasi tomonidan ishlab chiqilgan. Dizaynerlar avtomobilda Smart ForTwo modeliga xos belgilarni saqlab qolishga harakat qilgan. Seriyali versiya 2026-yilgi Pekin avtosalonida namoyish etilgan Concept #2 prototipining umumiy siluetini davom ettiradi.
Elektromobilning shassisi va asosiy texnologiyalari Geely tomonidan ishlab chiqilgan. Model Electric Compact Architecture platformasiga quriladi va orqa g‘ildirakdan tortish tizimiga ega bo‘ladi. Ishlab chiqaruvchi avtomobil tor shahar ko‘chalarida yuqori manevrchanlikni ta’minlashini bildirgan.
Texnik imkoniyatlar
Dastlabki ma’lumotlarga ko‘ra, Smart #2 sig‘imi 35,7 kVt/soat bo‘lgan akkumulyator bilan jihozlanadi. Modelning WLTP sikli bo‘yicha yurish masofasi qariyb 300 kilometrni tashkil etishi kutilmoqda. Akkumulyatorni 10 foizdan 80 foizgacha tez quvvatlash uchun taxminan 20 daqiqa talab etiladi. Avtomobilning burilish diametri esa 6,95 metrga teng bo‘ladi.
Avvalroq «Kursiv» UzAuto Motors Cobalt va Damas uchun chegirma e’lon qilgani haqida yozgan edi.
