Krishtianu Ronaldu va Jorjina Rodrigesning munosabatlari zamonaviy futbol olamidagi eng ko‘p muhokama qilinadigan sevgi hikoyalaridan biriga aylangan. Ularning tanishuvi Madrid markazidagi moda do‘konida boshlangan bo‘lsa, keyinchalik bu munosabat katta oila, dunyoning turli mamlakatlaridagi hayot, dabdabali sovg‘alar va murakkab sinovlarni birgalikda yengib o‘tish tarixiga aylandi. Kursiv Uzbekistan juftlikning tanishuvi va hozirgi kungacha bo’lgan sevgi yo‘li haqida hikoya qiladi.
Oddiy do‘konda boshlangan tanishuv
Krishtianu Ronaldu va Jorjina Rodriges 2016-yilda Madridda tanishgan. O‘sha paytda Ronaldu «Real Madrid»ning asosiy yulduzi, dunyodagi eng mashhur futbolchilardan biri edi. Jorjina esa Gucci butikida savdo maslahatchisi bo‘lib ishlardi.
Ularning birinchi uchrashuvi aynan shu do‘konda yuz bergan. Keyinchalik Jorjina tadbirlardan birida Ronaldu bilan yana ko‘rishganini va o‘sha uchrashuvda ular bemalol suhbatlashish imkoniga ega bo‘lganini aytgan. Juftlik Vogue Arabia bilan suhbatda bu tanishuvni bir qarashdayoq yuzaga kelgan o‘zaro qiziqish sifatida eslagan. Jorjinaning so‘zlariga ko‘ra, Ronaldu bilan ilk bor qo‘l ushlashganida u tushuntirib bo‘lmaydigan xotirjamlikni his qilgan.
Jorjinaning hayoti qisqa vaqt ichida keskin o‘zgardi. Avvallari u ishga jamoat transportida qatnagan bo‘lsa, munosabatlarning dastlabki davrida Ronaldu ba’zan uni butik oldidan qimmatbaho avtomobillarida olib ketardi. Jorjina Netflix’ning «Men — Jorjina» loyihasida hamkasblari uning Bugatti avtomobiliga o‘tirib ketayotganini ko‘rib hayratda qolganini eslagan.
Munosabatlar qanday oshkor bo‘ldi
Ronaldu va Jorjina dastlab munosabatlarini ommadan imkon qadar uzoq tutishga harakat qilgan. Biroq 2017-yil 9-yanvarda ular Syurixda o‘tkazilgan FIFAning yil yakunlari marosimiga birgalikda tashrif buyurdi. Marosimda Ronaldu o‘g‘li Krishtianu Junior ham ular bilan birga edi.
Bu ularning juftlik sifatidagi dastlabki yirik ommaviy chiqishi bo‘ldi. Oradan bir necha oy o‘tib, Ronaldu ijtimoiy tarmoqdagi sahifasida Jorjina bilan tushgan suratini e’lon qilib, munosabatlarni rasman tasdiqladi.
Dastlab jamoatchilik e’tibori asosan Jorjinani mashhur futbolchining yangi sevgilisi sifatida kuzatishga qaratildi. Vaqt o‘tishi bilan esa u Ronaldu hayotidagi tasodifiy inson emasligi, balki oilaning muhim a’zosiga aylangani ko‘rindi.
Besh farzandni tarbiyalayotgan katta oila
Ronaldu va Jorjina bugungi kunda besh farzandni birgalikda tarbiyalamoqda. Ronaldu Jorjina bilan tanishguniga qadar Krishtianu Juniorning otasi edi. 2017-yilda egizaklar Eva va Mateu dunyoga keldi. O‘sha yilning noyabrida esa Ronaldu va Jorjinaning birinchi umumiy farzandi Alana Martina tug‘ildi.
2022-yilda juftlik egizak kutayotganini ma’lum qilgan edi. Tug‘uruq vaqtida ularning o‘g‘li vafot etdi, qizi Bella Esmeralda esa sog‘lom tug‘ildi. Oila bu og‘ir davrni birgalikda boshdan kechirdi. Jorjina keyinchalik Ronaldu unga hayotga qaytish, farzandlari uchun bardam bo‘lish va oldinga harakat qilishda yordam berganini aytdi.
Jorjina nafaqat Alana va Bellaning onasi, balki Ronalduning boshqa farzandlari tarbiyasida ham faol qatnashadi. Oilaning ijtimoiy tarmoqlardagi suratlarida ular tug‘ilgan kunlar, maktab tadbirlari, sayohatlar va futbol uchrashuvlarini ko‘pincha birga o‘tkazishi ko‘rinadi.
Ronaldu ham farzandlarining hayotidagi o‘rnini muntazam ta’kidlaydi. Masalan, uning futbol butsalariga Krishtianu Junior, Mateu, Eva, Alana va Bellaning ismlari yozilgan.
Madrid, Turin, Manchester va Ar-Riyoddagi hayot
Ronaldu faoliyati davomida klublarni almashtirgani sababli oila bir necha bor boshqa mamlakatga ko‘chishga majbur bo‘ldi. Ular avval Madridda, keyinchalik Ronaldu «Yuventus»da o‘ynagan davrda Turin shahrida yashadi. Futbolchi «Manchester Yunayted»ga qaytgach, oila Buyuk Britaniyaga ko‘chib o‘tdi.
2022-yil oxirida Ronaldu Saudiya Arabistonining «An-Nasr» klubiga qo‘shilgach, Jorjina va bolalar ham Ar-Riyodga ko‘chdi. Jorjina Saudiya Arabistonidagi hayot, mamlakat madaniyati va oilasi bilan o‘tkazayotgan vaqti haqida bir necha bor ijobiy fikr bildirgan.
Ularning kundalik turmushi tashqaridan nihoyatda dabdabali ko‘rinadi. Oilaning ixtiyorida katta uylar, qimmat avtomobillar va sayohat imkoniyatlari bor. Ular ta’tilni ko‘pincha dengiz bo‘yida yoki yaxtada o‘tkazadi. Biroq Jorjina o‘zining hujjatli serialida oilaning oddiy odatlari ham mavjudligini, uyda farzandlar tarbiyasi, maktab, ovqatlanish va kundalik mas’uliyatlar birinchi o‘rinda turishini ko‘rsatishga uringan.
Jorjina faqat futbolchi sevgilisi bo‘lib qolmadi
Ronaldu bilan munosabatlar Jorjinani xalqaro miqyosda mashhur qildi, ammo u bu imkoniyatdan shaxsiy faoliyatini rivojlantirish uchun ham foydalandi. Jorjina model, bloger, tadbirkor va teleloyiha qahramoni sifatida ishlay boshladi.
U xalqaro moda tadbirlarida qatnashdi, jurnallar muqovasida suratga tushdi va Netflix’ning «Men — Jorjina» serialida o‘z hayoti, oilasi va faoliyati haqida hikoya qildi. Netflix uni ona, model, tadbirkor va jamoatchilik vakili sifatida taqdim etadi.
Jorjina mashhurlikka faqat Ronaldu sabab erishganini inkor etmaydi. Shu bilan birga, u o‘zining alohida yo‘li va faoliyati borligini ta’kidlaydi. Vogue Arabia bilan suhbatda Jorjina Ronaldu va ularning oilasi bilan faxrlanishini, biroq shaxsiy kuchi va mehnati orqali o‘z o‘rnini topganini aytgan.
Bir-biriga qanday sovg‘alar berishadi
Ronaldu va Jorjinaning munosabatlarida qimmatbaho sovg‘alar ham alohida o‘rin tutadi. Eng esda qolarli sovg‘alardan biri 2022-yilda Jorjinaning 28 yoshga to‘lishi munosabati bilan tashkil etilgan. Ronaldu Dubaydagi Burj Xalifa binosining tashqi ekranida Jorjinaga bag‘ishlangan surat va videolarni namoyish ettirdi. Dunyodagi eng baland binolardan birida namoyish etilgan tabrik Jorjinaning Netflix seriali chiqishi bilan ham bir vaqtga to‘g‘ri kelgan edi.
Jorjina ham Ronalduga katta sovg‘alar taqdim etgan. 2022-yilgi Rojdestvo bayramida u futbolchini Rolls-Royce avtomobili bilan hayratda qoldirdi. Bayram videosida oilaning boshqa a’zolari uchun tayyorlangan sumkalar va bolalarga berilgan velosipedlar ham ko‘rsatilgan.
Barcha sovg‘alar ham avtomobil yoki zargarlik buyumlari shaklida emas. Jorjina 2024-yilda Parij moda haftaligida Ronalduning mashhur yettinchi raqamiga bag‘ishlangan qizil libosda podiumga chiqdi. Kiyimning old tomonida futbolchining imzosiga o‘xshash yozuv ham bor edi. Bu chiqish Jorjinadan Ronalduga ramziy hurmat sifatida qabul qilindi.
Uzoq kutilgan unashtiruv
Juftlik yillar davomida nikoh masalasiga oid savollarga duch keldi. Ronaldu avvalroq Jorjina bilan turmush qurish niyati borligini aytgan bo‘lsa-da, uzoq vaqt davomida rasmiy taklif bo‘lmagan.
Vaziyat 2025-yil 11-avgustda o‘zgardi. Jorjina katta oval olmosli uzuk taqilgan qo‘lini Ronalduning qo‘li ustiga qo‘yib tushgan suratini e’lon qildi va turmush qurish taklifini qabul qilganini bildirdi.
Juftlik uzukning narxi va olmosning aniq o‘lchamini oshkor qilmagan. Zargarlik sohasi mutaxassislari uning markaziy olmosi 35 karatgacha, umumiy og‘irligi esa 37 karat atrofida bo‘lishi mumkinligini taxmin qilgan. Turli baholashlarda uzuk qiymati $2 mln dan $5 mlngacha ekani aytilgan, biroq bu summalar Ronaldu yoki Jorjina tomonidan tasdiqlanmagan.
Mashhurlik ortidagi munosabat
Ronaldu va Jorjina hayoti odatda qimmat avtomobillar, dizaynerlik liboslari, katta uylar va ekzotik sayohatlar orqali namoyon bo‘ladi. Biroq juftlikning hikoyasi faqat boylik va sovg‘alardan iborat emas.
Ular futbolchining faoliyati sababli bir necha mamlakatga ko‘chdi, besh farzandning tarbiyasini birgalikda olib bordi va oilaviy yo‘qotishni boshdan kechirdi. Jorjina Ronalduning muhim uchrashuvlarini stadiondan kuzatib kelgan bo‘lsa, futbolchi uning moda, media va biznesdagi faoliyatini omma oldida qo‘llab-quvvatlab keladi.
Shu sababli ularning munosabatlari oddiy sotuvchi qiz va futbol yulduzining tasodifiy tanishuvidan boshlangan ertak sifatida emas, balki vaqt o‘tishi bilan oila, hamkorlik va o‘zaro mas’uliyatga aylangan sevgi hikoyasi sifatida ko‘riladi.
Avvalroq «Kursiv» Jorjina Rodriges Krishtianu Ronaldu bilan to‘yi oldidan orzusini amalga oshirgani haqida yozgan edi.
