Markaziy bank soxta litsenziya haqida ogohlantirdi
Markaziy bank internetda uning nomidan tayyorlangan soxta litsenziya tarqatilayotganini ma’lum qildi. Hujjatda ko‘rsatilgan «Oltin Oy Kredit» aksiyadorlik-tijorat banki mavjud emas va unga Markaziy bank tomonidan hech qanday litsenziya berilmagan.
Litsenziya rasmiylashtirilmagan
Regulyator ushbu tashkilotga hech qanday litsenziya berilmaganini ma’lum qildi.
Shu sabab fuqarolar va tashkilotlar bunday hujjatlarga ishonmaslikka hamda firibgarlik holatlaridan ehtiyot bo‘lishga chaqirildi.
Banklar ro‘yxatini rasmiy saytdan tekshirish kerak
Markaziy bank litsenziyaga ega banklar ro‘yxatini faqat o‘zining rasmiy veb-sayti cbu.uz orqali tekshirishni tavsiya qildi.
Fuqarolarga moliyaviy tashkilotlar bilan bog‘liq hujjatlar va takliflarni qabul qilishdan oldin ularning rasmiy maqomini tekshirib olish eslatildi.
Eslatib o‘tamiz, avvalroq bank va mikromoliya tashkilotlari islomiy bank faoliyatiga o‘tishi mumkinligi haqida xabar berilgandi. Adliya vazirligi mikromoliya tashkiloti va bank faoliyatini o‘zgartirish tartibi haqidagi nizomga kiritilgan o‘zgartirishlarni davlat ro‘yxatidan o‘tkazdi.
