Apple yangi avlod iPhone’larini ishlab chiqarishda xotira chiplarining yetishmovchiligiga duch kelgan bo‘lishi mumkin. Culpium manbalariga ko‘ra, kompaniya uchun ishlab chiqarilgan qariyb $1 mlrdlik protsessor plastinalari DRAM yetkazib berilishini kutmoqda.
Gap protsessorlarning o‘zi yetishmayotgani haqida emas. Tayyorlangan chiplarni yakuniy qadoqlash jarayonida xotira komponentlari ham kerak bo‘ladi. DRAM ta’minotidagi cheklovlar tufayli ayrim protsessorlar hozircha keyingi ishlab chiqarish bosqichiga o‘tkazilmagan.
Bu holat kuzda kutilayotgan yangi iPhone’larning dastlabki yetkazib berilishiga ta’sir qilishi mumkin. Biroq Apple ham, uning hamkorlari ham hozircha boshlang‘ich talabni qondira olishiga ishonmoqda. Culpium ma’lumotlaridagi $1 mlrdlik ko‘rsatkich Apple tomonidan rasman tasdiqlanmagan.
Apple DRAM uchun yetkazib beruvchilar bilan kurashmoqda
Apple mobil qurilmalar uchun DRAM xotirasini bir nechta yirik ishlab chiqaruvchilardan xarid qiladi. Kompaniyaning asosiy hamkorlari qatoriga Micron, Samsung Electronics va SK Hynix kiradi.
So‘nggi davrda sun’iy intellekt infratuzilmasining jadal kengayishi xotira bozoridagi vaziyatni keskinlashtirdi. Ishlab chiqaruvchilar yuqori daromad keltiradigan HBM xotirasiga ko‘proq quvvat ajratayotgani sababli smartfon va kompyuterlarda ishlatiladigan odatiy DRAM taklifi ham bosim ostida qolmoqda. IDC 2026-yilda DRAM yetkazib berish hajmining o‘sishi tarixiy ko‘rsatkichlardan past bo‘lishini kutmoqda.
Apple bosh direktori Tim Kuk ham kompaniyaning xotira uchun xarajatlari sezilarli oshganini tan olgan. U xotira bozorida yetkazib beruvchilar soni cheklanganiga e’tibor qaratib, kelgusi davrda xarajatlar yanada ko‘tarilishi mumkinligini bildirgan.
Yangi iPhone’lar taqchilligi yuzaga kelishi mumkin
Culpium ma’lumotlariga ko‘ra, yangi iPhone avlodi taqdimotigacha vaqt kam qolgan bir paytda Apple zarur DRAM hajmini ta’minlashga urinmoqda. Agar xotira yetkazib berishdagi muammolar o‘z vaqtida bartaraf etilmasa, yangi smartfonlarning ayrim versiyalari savdo boshlanishida cheklangan miqdorda mavjud bo‘lishi mumkin.
Hozircha bu ssenariy tasdiqlangan emas. Apple va uning qurilmalarini yig‘uvchi hamkorlari dastlabki talabni qondirish imkoniyatiga ega ekanini kutmoqda. Asosiy xavf sotuvlarning keyingi bosqichida, talab yuqori darajada saqlanib qolgan taqdirda yuzaga kelishi mumkin.
Eslatib o‘tamiz, Kursiv Uzbekistan nashri Apple, Google va Meta O‘zbekistonda 143,8 mlrd so‘m soliq to‘lagani haqida yozgan edi.
