«Mehrli maktab»larda xodimlar ustamasi 200 foizga oshirilishi mumkin
Maktabgacha va maktab ta’limi vazirligi «O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida»gi qaror loyihasini jamoatchilik muhokamasiga qo‘ydi. Hujjat bilan «Mehrli maktab»larda xodimlarning mehnat sharoitlari va muassasalarning shtatlar tarkibini o‘zgartirish taklif etilmoqda.
Xodimlar ustamasi 200 foizgacha oshiriladi
Qaror loyihasida «Mehrli maktab» xodimlariga davlat budjeti hisobidan to‘lanadigan ustama miqdorini oshirish nazarda tutilgan.
Amaldagi tartibga ko‘ra, xodimlarga lavozim maoshining 100 foizi miqdorida ustama to‘lanadi. Yangi loyihada esa ushbu ustamani 200 foizgacha oshirish taklif etilmoqda.
Ya’ni, taklif ma’qullansa, «Mehrli maktab»larda faoliyat yuritayotgan xodimlarning lavozim maoshiga to‘lanadigan qo‘shimcha ustama miqdori ikki baravarga oshiriladi.
Shtatlar jadvali qayta ko‘rib chiqiladi
Loyihada muassasalarning amaldagi shtatlar jadvalini bekor qilish ham ko‘zda tutilgan.
Uning o‘rniga «Mehrli maktab»larning quvvatidan kelib chiqib shakllantiriladigan yangi namunaviy shtatlar jadvali tasdiqlanishi rejalashtirilmoqda.
Bu orqali xodimlar soni va lavozimlar tarkibini muassasaning imkoniyatlari hamda o‘quvchilar soniga moslashtirish nazarda tutilgan.
Yangi lavozimlar paydo bo‘ladi
Yangi namunaviy shtatlar jadvalida pedagog xodimlardan tashqari bir qator ma’muriy va texnik lavozimlarni joriy etish taklif qilinmoqda.
Jumladan, quyidagi lavozimlar bo‘lishi mumkin:
- xo‘jalik mudiri;
- kadrlar bo‘yicha menejer;
- kotiba;
- axborot-kommunikatsiya texnologiyalari bo‘yicha mutaxassis;
- yuriskonsult;
- matbuot xizmati matbuot kotibi.
«Mehrli maktab»lar haqida
«Mehrli maktab»lar uzoq muddat davolanishga muhtoj bo‘lgan bolalarning ta’lim olish imkoniyatini ta’minlashga xizmat qiladi. Bunday muassasalarda ta’lim jarayoni bolalarning sog‘lig‘i va davolanish sharoitlarini hisobga olgan holda tashkil etiladi.
Avvalroq Kursiv Uzbekistan davlat xizmatchilari uchun yangi ish haqi tizimi joriy etilishi rejalashtirilayotgani haqida yozgandi.
