Tashiyevga boshqa davlat lavozimi bermayman — Japarov
Qirg‘iziston prezidenti Sadir Japarov sobiq davlat mulozimi Qamchibek Tashiyev bilan munosabatlari haqida gapirib, uning boshqa davlat lavozimiga tayinlanishi rejalashtirilmaganini ma’lum qildi. Bu haqda davlat rahbari Ali Toqtaqunovga bergan intervyusida so‘z ochdi.
Japarov Tashiyev bilan do‘stligi saqlanib qolishini aytdi
Japarov intervyu davomida Tashiyev bilan 2005-yildan beri do‘st bo‘lib kelayotganini aytdi. Uning so‘zlariga ko‘ra, ular oilaviy tarzda ham yaqin munosabatda bo‘lgan.
Prezident 2020-yilda hokimiyatga kelganidan so‘ng Tashiyevni Milliy xavfsizlik davlat qo‘mitasi raisi etib tayinlaganini eslatdi. Japarovning baholashicha, Tashiyev besh yil davomida lavozimida yaxshi ishlagan. Biroq uning faoliyatida jiddiy kamchilik ham bo‘lgan.
«U do‘stligicha qoladi, ammo lavozimga tayinlamayman»
Japarovning aytishicha, Tashiyev o‘z do‘stlari va maktabdoshlarining faoliyatini yetarlicha nazorat qila olmagan. Prezident uning lavozimdan ketishiga sabab bo‘lgan kamchiliklardan biri sifatida aynan shuni ko‘rsatdi.
«U mening do‘stim bo‘lib qoladi, ammo uni boshqa biror davlat lavozimiga tayinlash rejam yo‘q», – dedi Japarov.
Prezident Tashiyevga hozircha dam olish, faoliyatini tahlil qilish va qayerda xato qilganini tushunib olish kerakligini aytgan.
Shu bilan birga, Japarov sobiq amaldorning faoliyatini faqat xatolardan iborat deb baholash noto‘g‘ri ekanini ta’kidladi. Uning fikricha, Tashiyevning mamlakatdagi erishilgan natijalarga qo‘shgan hissasi ham katta.
«75 oqsoqol maktubi»dan Tashiyev ishigacha
2026-yil 9-fevral. Qirg‘izistonning 75 nafar sobiq amaldori, siyosatchisi, jamoat arbobi va ziyolisi prezident Sadir Japarov hamda Jogorku Kenesh raisiga ochiq murojaat yo‘lladi. «75 oqsoqol maktubi» nomi bilan tanilgan murojaatda prezidentlik saylovlarini muddatidan oldin o‘tkazish talab qilindi. Murojaatda Qamchibek Tashiyevning nomi bevosita tilga olinmagan.
10-fevral. Ertasi kuni Japarov Tashiyevni Milliy xavfsizlik davlat qo‘mitasi raisi va Vazirlar Mahkamasi raisi o‘rinbosari lavozimlaridan ozod qildi. Prezident keyinchalik bu qarorni «75 oqsoqol maktubi» atrofida yuzaga kelgan siyosiy keskinlik va jamiyat hamda davlat tuzilmalari o‘rtasida bo‘linish xavfi bilan izohladi. Tashiyevning o‘rniga Jumbek Shabdanbekov tayinlandi, xavfsizlik tizimining tuzilmasi ham o‘zgartirildi.
9-iyul. «75 oqsoqol maktubi» bo‘yicha sud hukmi chiqarildi. Tashiyevning advokatlari esa sud jarayonida unga nisbatan hokimiyatni zo‘ravonlik bilan egallashga tayyorgarlik ko‘rganini tasdiqlovchi dalillar taqdim etilmaganini ta’kidladi. Bu esa Tashiyevning keyingi siyosiy faoliyati, xususan, 2027-yilgi prezidentlik saylovida ishtirok etishi mumkinmi, degan savolni yana kun tartibiga olib chiqdi.
Avvalroq Qirg‘iziston Davlat milliy xavfsizlik qo‘mitasining sobiq raisi Qamchibek Tashiyev «75 oqsoqol maktubi» ishi bo‘yicha to‘rt yilga ozodlikdan mahrum qilingandi.
