Xitoy poyezdi 5,3 soniyada 800 km/soatga tezlashdi — rekord
Xitoyda yaratilgan tajriba magnit yostiqli poyezdi 5,3 soniyada soatiga 800 km tezlikka chiqib, yangi jahon rekordini o‘rnatdi. Sinov Xubey provinsiyasidagi bir kilometr uzunlikdagi maxsus poligonda o‘tkazildi. Bu haqda CGTN xabar berdi.
Poyezd 5,3 soniyada rekord tezlikka chiqdi
Sinovda foydalanilgan modelning og‘irligi 1 110 kilogrammni tashkil etdi. CGTN ma’lumotiga ko‘ra, bu magnit yostiqli tizimning olti oy ichida o‘rnatgan uchinchi jahon rekordidir.
Avvalroq ushbu texnologiya asosidagi qurilma soatiga 650 km tezlikka erishgan edi. O‘sha sinovda tezlikka chiqish uchun qariyb yetti soniya va 600 metr masofa talab qilingan.
G‘ildiraklar o‘rniga magnit levitatsiyasidan foydalaniladi
Tizim oddiy poyezdlardagi kabi g‘ildiraklardan foydalanmaydi. Magnit levitatsiyasi tufayli qurilma rels ustida muallaq holatda harakatlanadi va g‘ildirak bilan rels o‘rtasidagi ishqalanish deyarli yo‘qoladi.
Rels bo‘ylab joylashtirilgan elektromagnit tizim poyezdni bir vaqtning o‘zida ko‘taradi va oldinga harakatlantiradi. Yuqori tezlikda tizim juda katta aniqlikni talab qiladi – yo‘lning belgilangan holatdan og‘ishi 0,5 millimetrdan oshmasligi kerak.
Texnologiya raketalarni uchirishda ham qo‘llanishi mumkin
Ishlab chiquvchilar bunday tizimdan faqat temiryo‘l transportida foydalanishni rejalashtirmayapti. CGTN ma’lumotiga ko‘ra, elektromagnit tezlashtirish texnologiyasi kelajakda raketalar va harbiy samolyotlarni uchirish tizimlarida ham qo‘llanishi mumkin.
Biroq soatiga 800 km tezlik va bunday keskin tezlanishning yaqin kelajakda oddiy yo‘lovchi poyezdlarida qo‘llanishi kutilmayapti. Hozircha loyiha, avvalo, yuqori tezlikdagi elektromagnit harakatlantirish texnologiyalarini sinovdan o‘tkazishga xizmat qilmoqda.
Avvalroq «Kursiv» nashri Belarusdan O‘zbekistonga ilk «Slavyan karvoni» blok-poyezdi yo‘lga qo‘yilgani haqida yozgandi.
