Apple’ning bazaviy iPhone 17 smartfoni DxOMark kamera testida 157 ball to‘plab, jahon reytingida 20-o‘rinni egalladi. Qurilma Samsung Galaxy S26 Ultra, iPhone 16 Pro va Oppo Find X7 Ultra bilan bir xil natija qayd etdi.
iPhone 16’dan 10 ball yuqori natija
iPhone 17 avvalgi bazaviy iPhone 16’ga nisbatan kamera sinovida 10 ball ko‘proq to‘pladi. Bunga ta’sir qilgan asosiy yangilanishlardan biri ultra keng burchakli kameraning 12 MP’dan 48 MP’gacha kuchaytirilgani bo‘ldi.
Smartfonning asosiy kamerasi ham 48 MP aniqlikka ega. Unda f/1,6 diafragmali obyektiv va 1/1,56 dyuymli sensor qo‘llanilgan. Bu modul avvalgi avloddan deyarli o‘zgarishsiz o‘tgan.
DxOMark sinovlari davomida iPhone 17 ayniqsa video suratga olishda yaxshi natija ko‘rsatgan. Mutaxassislar ranglarning aniq uzatilishi, tezkor avtofokus, samarali tasvir barqarorlashtirish va shovqinni nazorat qilish imkoniyatlarini yuqori baholagan. Shu bilan birga, shovqinni kuchli kamaytirish ayrim vaziyatlarda mayda detallarning yo‘qolishiga olib kelishi mumkin.
Telefoto kamera asosiy kamchilik bo‘lib qoldi
iPhone 17’ning kamera tizimidagi asosiy cheklov alohida telefoto obyektivning yo‘qligi bo‘ldi. Kattalashtirishda smartfon raqamli kadr kesish usulidan foydalanadi va shu sababli optik zumga ega flagmanlardan ortda qoladi.
DxOMark portret rejimida ham ayrim kamchiliklarni qayd etgan. Xususan, bir vaqtning o‘zida bir nechta odamni suratga olishda tasvir sifati va obyektlarni ajratish barqarorligi pasayishi mumkin.
Umumiy 157 ball bilan iPhone 17 reytingda Samsung Galaxy S26 Ultra, iPhone 16 Pro va Oppo Find X7 Ultra bilan tenglashdi. Bazaviy modelda alohida telefoto kamera mavjud emasligini hisobga olganda, qurilma kamera sinovlarida flagmanlar darajasiga yaqin natija qayd etdi.
Avvalroq Kursiv Uzbekistan iPhone 17 Pro kamerasi DxOMark testida uchta rekord o‘rnatgani haqida xabar bergan edi. O‘shanda Pro model umumiy kamera reytingida uchinchi o‘rinni egallagan.
