Endi 10-sinf o‘quvchilari ham texnikumda o‘qishni davom ettirishi mumkin
10-sinf o‘quvchilarining umumiy o‘rta ta’lim maktabidan texnikumga o‘qishini ko‘chirish tartibi joriy etiladi. Bu Vazirlar Mahkamasining tegishli qarori bilan belgilandi.
Yagona tartib joriy etiladi
450-son qaror bilan kasbiy ta’lim tashkilotlari o‘quvchilarining o‘qishini ko‘chirish yoki qayta tiklash, shuningdek, 10-sinf o‘quvchilarini texnikumlarga ko‘chirish bo‘yicha yagona tartib belgilanadi.
Arizalar elektron shaklda topshiriladi
Davlat xizmatidan foydalanish uchun arizalarni Davlat xizmatlari markazlari yoki Yagona interaktiv davlat xizmatlari portali (YIDXP) orqali elektron shaklda topshirish mumkin bo‘ladi.
O‘qishni ko‘chirish va qayta tiklash bo‘yicha xulosa berishning ham yagona tartibi joriy etiladi.
Jarayon raqamlashtiriladi
Raqamli texnologiyalar vazirligi bilan hamkorlikda ikki oy muddatda mazkur xizmatlarni YIDXP orqali ko‘rsatish imkoniyati yaratilishi belgilangan.
Shuningdek, xizmat ko‘rsatish uchun zarur ma’lumotlarni davlat organlaridan elektron shaklda olish yo‘lga qo‘yiladi.
Ortiqcha byurokratiya kamayadi
Yangi tartib natijasida o‘qishni ko‘chirish va qayta tiklash bilan bog‘liq xizmatlar raqamlashtirilib, fuqarolarning murojaat qilish jarayoni soddalashtiriladi. Bu esa ortiqcha hujjatbozlik va byurokratik jarayonlarni kamaytirishga xizmat qiladi.
Avvalroq Kursiv Uzbekistan maktablarda yangi o‘quv yili 2-sentabrdan boshlanishi haqida yozgandi.
