ChatGPT Yevropaning 31 ta davlatida reklama ko‘rsatishni boshlaydi

ChatGPT 24-avgustdan boshlab Yevropaning 31 ta davlatidagi foydalanuvchilarga reklama ko‘rsatishni boshlaydi. Bu OpenAI’ning reklama dasturini ishga tushirgandan buyon eng yirik kengayishi bo‘ladi.

Bepul foydalanuvchilar reklama ko‘radi

Reklamalar ChatGPT’ning bepul va Go tariflaridan foydalanuvchilarga ko‘rsatiladi. Plus, Pro va Enterprise obunalariga reklama joriy etilmaydi.

Ro‘yxatda Germaniya, Fransiya, Ispaniya, Italiya, Shvetsiya, Norvegiya, Daniya, Niderlandiya va Avstriya kabi davlatlar bor.

Reklama javoblardan alohida bo‘ladi

OpenAI ma’lumotlariga ko‘ra, reklama beruvchilar foydalanuvchilarning ChatGPT’dagi yozishmalariga kira olmaydi. Reklamalar chatbot javoblaridan alohida ko‘rsatiladi va javoblar mazmuniga ta’sir qilmaydi.

Kompaniya, shuningdek, 18 yoshdan kichik foydalanuvchilarga reklama ko‘rsatilmasligini bildirgan.

Reklama dasturi kengaymoqda

OpenAI 2026-yil fevralida AQShda ChatGPT reklamasini sinovdan o‘tkazishni boshlagan. Keyinchalik dastur yana bir nechta bozorlarga kengaytirildi. Yevropaning 31 ta davlatiga joriy etilishi esa ushbu dasturning hozirgacha eng katta kengayishi hisoblanadi.

Avvalroq Kursiv Uzbekistan ChatGPT otasi 8 yoshli bolasini o‘ldirishni rejalashtirganini aniqlagani haqida yozgandi.