Meta Platforms sud da’volari uchun 18 mlrd dollar to‘laydi
Meta Platforms AQSh shtatlari bilan bolalarning Facebook va Instagram’ga qaramligi bo‘yicha sud da’volarini hal qilish uchun 10 yil davomida $18 mlrdgacha to‘lashga rozi bo‘ldi. Bu haqda Reuters xabar bermoqda.
Shtatlar kompaniyani o‘z platformalarining yosh foydalanuvchilarga ta’siri bilan bog‘liq xavflarni yetarlicha oshkor qilmaganlikda ayblagan.
Kelishuv 18-avgustda boshlangan federal sud jarayonini yakunlaydi. Kaliforniya, Kolorado, Kentukki va Nyu-Jersi Meta’dan fuqarolik jarimalari sifatida jami qariyb $200 mlrd talab qilishni rejalashtirgan edi.
Meta ayblovlarni tan olmadi, biroq shtatlarga kompensatsiya to‘lash hamda o‘smirlar uchun Facebook va Instagram’dan foydalanish qoidalarini o‘zgartirishga rozi bo‘ldi.
Kolorado bosh prokurori Fil Vayzerning ta’kidlashicha, ishning asosiy maqsadi bolalarni himoya qilish bo‘lgan.
O‘smirlar uchun foydalanish vaqti cheklanadi
Kelishuvga ko‘ra, Meta keyingi o‘n yil davomida o‘smirlarning Facebook va Instagram’dan foydalanishini kuniga ikki soat bilan cheklashi kerak.
Voyaga yetmagan foydalanuvchilar ota-onasining roziligisiz yarim tundan ertalab soat 06:00 gacha ushbu platformalardan foydalana olmaydi.
Bundan tashqari, Meta maktab vaqtida, ya’ni soat 08:00 dan 15:00 gacha ko‘pchilik push-bildirishnomalarni o‘chirishi, voyaga yetmaganlarni yoshga doir cheklovlar qo‘yilgan kontentdan kuchliroq himoya qilishi va foydalanuvchilarning yoshini aniqlash tizimini takomillashtirishi kerak.
Shuningdek, o‘smirlarning platformada uzoqroq qolishiga olib keluvchi ayrim funksiyalar ham cheklanadi.
Agar Snapchat, TikTok va YouTube ham shunga o‘xshash himoya choralarini joriy etsa, Meta uchun belgilangan ayrim talablar yanada kuchaytirilishi mumkin.
Tavsiyalar va reklama tizimi saqlanib qoladi
Kelishuv Meta’ni foydalanuvchilarga moslashtirilgan tavsiyalar berish tizimidan yoki maqsadli reklamadan voz kechishga majbur qilmaydi.
Shuningdek, o‘smirlarning o‘z tashqi ko‘rinishini qabul qilishiga salbiy ta’sir qilishi mumkin bo‘lgan ayrim kontent turlari ham kelishuv doirasiga to‘liq kiritilmagan.
Meta yosh foydalanuvchilar xavfsizligi kompaniyaning asosiy ustuvor yo‘nalishlaridan biri bo‘lib qolishini bildirdi.
Kompaniya ota-onalar va o‘smirlar uchun platformalarni xavfsizroq qilish bo‘yicha choralarni davom ettirishini ma’lum qilgan.
Shtatlar $16,7 mlrdgacha olishi mumkin
Kelishuvning asosiy qismi 47 ta shtat, Vashington shahri, Puerto-Riko, Amerika Samoasi va Shimoliy Mariana orollariga jami $16,7 mlrdgacha to‘lovlarni nazarda tutadi.
Kaliforniya taxminan $2,2 mlrd, Nyu-York esa qariyb $1,1 mlrd olishi mumkin. Texas Meta bilan alohida kelishuv tuzgan bo‘lib, uning qiymati $1 mlrddan ortiqni tashkil etadi.
Avvalroq «Kursiv» Meta trln dollardan ortiq jarima to‘lashi mumkinligi haqida yozgan edi.
