Toshkentda xotinini kaltaklashda gumonlangan sport ustasiga jinoyat ishi qo‘zg‘atildi

Toshkentda turmush o‘rtog‘ini muntazam kaltaklab kelganlikda gumon qilinayotgan yunon-rum kurashi bo‘yicha murabbiy va sport ustasiga nisbatan jinoyat ishi qo‘zg‘atildi. Bu haqda poytaxt IIBB matbuot xizmatiga tayanib Nemolchi.uz loyihasi xabar berdi.

Jabrlanuvchi ayolning so‘zlariga ko‘ra, eri unga muntazam ravishda jismoniy zo‘ravonlik qilgan. Ayol, shuningdek, turmush o‘rtog‘i oilani moddiy jihatdan yetarli ta’minlamagani sababli ikki nafar kichik yoshli farzandi, jumladan, bir yoshli bolasi bilan yashash uchun doimiy ravishda kredit olishga majbur bo‘lganini bildirgan.

Jabrlanuvchiga himoya orderi berildi

Ma’lum qilinishicha, hozirda jabrlanuvchi ayolga himoya orderi rasmiylashtirilgan. Shuningdek, unga nisbatan sud-tibbiy ekspertizasi o‘tkazilgan.

Nemolchi.uz ma’lumotiga ko‘ra, voqea ijtimoiy tarmoqlarda muhokamalarga sabab bo‘lgan. Post ostidagi izohlarda gumon qilinayotgan erkakning ayrim yaqinlari va tanishlari uni himoya qilgan.

Loyiha esa jabrlanuvchiga gumon qilinayotgan shaxsning tanishlari tomonidan arizasini qaytarib olish uchun bosim o‘tkazilayotgani haqidagi da’volar mavjudligini ma’lum qilgan.

Jinoyat ishi oilaviy zo‘ravonlik moddasi bo‘yicha ochildi

Poytaxt IIBB ma’lumotiga ko‘ra, gumon qilinayotgan erkakka nisbatan O‘zbekiston Jinoyat kodeksining 126-1-moddasi 3-qismi, ya’ni oilaviy (maishiy) zo‘ravonlik alomatlari bo‘yicha jinoyat ishi qo‘zg‘atilgan.

Hozirda holat yuzasidan tergovga qadar tekshiruv harakatlari olib borilmoqda. Huquqni muhofaza qiluvchi organlar tomonidan ishning barcha tafsilotlariga huquqiy baho berilishi kutilmoqda.

Eslatib o‘tamiz, Kursiv Uzbekistan nashri Uchtepada uy boshqaruvi nomidan 574,6 mln so‘m olingani aniqlangani haqida yozgan edi.