Jorjina Rodriges Krishtianu Ronalduning avvalgi munosabatlaridan bo‘lgan uch farzandi – Krishtianu Ronaldu Jr., Eva Mariya va Mateoni rasman asrab olgani haqida xabarlar tarqaldi. HOLA! Spain nashri Madridda faoliyat yurituvchi Le Morne Brabant Abogados yuridik firmasining huquqiy direktori Mariya Espinga murojaat qilib, bunday holatda asrab olishning huquqiy oqibatlarini tushuntirdi.
Ekspertning qayd etishicha, turmush o‘rtog‘i yoki doimiy hamkorining farzandini asrab olish odatiy asrab olish jarayonidan farq qiladi. Bunda, birinchi navbatda, bolaning huquqiy maqomi, uning qonuniy ota-onalari kim ekani va boshqa ota-onaning ota-onalik huquqlari saqlanib qolgan-qolmagani aniqlanadi.
Shundan so‘ng, asrab oluvchi tegishli birinchi instansiya sudiga murojaat qilishi mumkin. Bunday holatda ayrim boshqa asrab olish jarayonlaridan farqli ravishda, bolalarni himoya qilish organining oldindan tavsiyasi talab etilmaydi.
12 yoshdan katta bolaning roziligi kerak
Sud jarayonida bolaning ota-onasi, oilaviy sharoit, juftlik o‘rtasidagi munosabat va asrab olish bolaning manfaatlariga qanchalik mos kelishi o‘rganiladi.
Ispaniya qonunchiligida 12 yoshga to‘lgan bola asrab olishga sud oldida shaxsan rozilik berishi kerak. 12 yoshdan kichik bolalarning fikri ham ularning yoshi va yetuklik darajasidan kelib chiqib inobatga olinadi.
Sud asrab olishni ma’qullaganidan keyin qaror Fuqarolik reyestriga kiritiladi. Shundan so‘ng asrab olgan shaxs bolaning qonuniy ota-onasiga aylanadi va barcha tegishli huquq hamda majburiyatlarni o‘z zimmasiga oladi.
Nikoh shart emas
Mariya Espinning tushuntirishicha, Ispaniyada bunday asrab olish uchun juftlikning, albatta, nikohdan o‘tgan bo‘lishi shart emas.
Fuqarolik kodeksi nafaqat turmush o‘rtog‘ining farzandini, balki nikohga teng darajadagi barqaror munosabatdagi hamkorning farzandini ham asrab olish imkonini beradi. Muhimi – munosabatning barqaror va oilaviy hayot shaklida ekanini isbotlash.
Shu sabab Jorjina va Ronalduning nikohdan o‘tishi bilan ehtimoliy asrab olish jarayonini to‘g‘ridan to‘g‘ri bog‘lash to‘g‘ri emas. Huquqiy jihatdan bu ikki alohida jarayon hisoblanadi.
Asrab oluvchi uchun qanday talablar bor
Umumiy qoidaga ko‘ra, asrab oluvchi 25 yoshdan katta bo‘lishi va u bilan bola o‘rtasidagi yosh farqi kamida 16 yil bo‘lishi kerak.
Sud, shuningdek, asrab oluvchining bolaning ehtiyojlarini qondirish, uni tarbiyalash va ota-onalik majburiyatlarini bajarish imkoniyatini baholaydi.
Asrab olish faqat familiyani o‘zgartirish yoki bola bo‘yicha ayrim qarorlarni qabul qilish huquqini olish bilan cheklanmaydi. U to‘liq va doimiy ota-ona hamda bola munosabatini yuzaga keltiradi.
Shu sababli keyinchalik juftlik ajrashsa ham, asrab olgan ota yoki ona bolaning qonuniy ota-onasi bo‘lib qolaveradi.
Boshqa biologik ota-ona bo‘lsa, jarayon murakkablashishi mumkin
Agar bolaning boshqa qonuniy ota-onasi mavjud bo‘lsa va uning ota-onalik huquqlari saqlanib qolgan bo‘lsa, odatda uning roziligi ham talab qilinadi.
Agar ikkinchi ota-ona qarshi chiqsa, jarayon oddiy asrab olish ishidan tortishuvli sud ishiga aylanishi mumkin. Ota-onaning bolani uzoq vaqt ko‘rmagani yoki boshqa shaxs uni amalda tarbiyalayotgani o‘z-o‘zidan ota-onalik huquqini bekor qilmaydi.
Qonunchilikda ayrim istisnolar mavjud. Masalan, ota-ona sud qarori bilan ota-onalik huquqidan mahrum etilgan bo‘lsa, uning roziligi talab qilinmasligi mumkin.
Eslatib o‘tamiz, Kursiv Uzbekistan nashri Ronaldu va Jorjina Rodriges to‘yining yangi tafsilotlari ma’lum bo‘lgani haqida yozgan edi.
