15 yoshli qizning ichagidan 20 kundan so‘ng igna chiqdi

Chechenistonda 15 yoshli qiz ro‘mol qadashga mo‘ljallangan ignani tasodifan yutib yubordi va u ichakda qariyb uch hafta qolib ketdi. Shifokorlar nazorati ostida bo‘lgan bemorning tanasidan begona jism, oxir-oqibat, tabiiy yo‘l bilan chiqib ketgan.

Shifoxonaga murojaat va rentgen xulosasi

Avgust oyining boshlarida o‘smir qiz uchi bezakli bo‘lgan ro‘mol ignasini ehtiyotsizlik oqibatida yutib yuborgan. U darhol shifoxonaga murojaat qilgan va ikki kundan so‘ng o‘tkazilgan rentgen tekshiruvi igna allaqachon ichakka yetib borganini ko‘rsatgan. Bu haqda bemorning qarindoshi, shifokor-nefrolog Tamila Sitsiyeva Sapa Kavkaz nashriga ma’lum qildi.

Jarrohlik amaliyotiga tayyorgarlik va kutilmagan yechim

Tibbiyot xodimlari ignaning harakatini muntazam kuzatib borishgan. Biroq takroriy rentgen natijalari uning joylashuvi deyarli o‘zgarmaganini ko‘rsatgan. Begona jism ancha uzoqda bo‘lgani sababli uni tibbiy uskuna yordamida olib chiqishning imkoni bo‘lmagan. Shifokorlar jarrohlik amaliyotini o‘tkazishga tayyorgarlik ko‘rayotgan bir paytda bunga hojat qolmagan.

«Igna qizning ichida 20 kun bo‘ldi. Nihoyat bemorga javob berildi, igna tabiiy yo‘l bilan chiqib ketdi. Bu juda kam uchraydigan holat va katta omad», – deydi Tamila Sitsiyeva.

Shifokor ro‘mol o‘raydigan barcha qiz-ayollarni ignani og‘izda ushlamaslikka chaqirdi. Uning ta’kidlashicha, aksariyat ayollar ro‘molni to‘g‘rilayotganda qo‘llarini bo‘shatish uchun ignani avtomatik ravishda lablari orasiga qistiradi.

Avvalroq Kursiv nashri Toshkentda sifatsiz tibbiyot buyumlarini sotayotgan shaxslar ushlangani haqida xabar bergan edi.