Messi Argentina terma jamoasidagi faoliyatini yakunladi
Argentina terma jamoasi va «Inter Mayami» hujumchisi Lionel Messi milliy jamoadagi faoliyatini yakunlashga qaror qilganini ma’lum qildi. Futbolchi bu haqda ijtimoiy tarmoqdagi sahifasida yozdi.
Messi 20 yil terma jamoa safida o‘ynadi
Messining qayd etishicha, u ushbu qarorni uzoq vaqt davomida o‘ylab ko‘rgan. Futbolchi terma jamoa safida o‘tgan 20 yil davomida bor kuchini berganini ta’kidladi.
«Bu og‘riqli qaror bo‘ldi. Ammo hozir buning uchun eng munosib vaqt ekanini tushunyapman. Men doimo bor kuchimni berdim va bu futbolka uchun bor vujudim bilan kurashdim», – deb yozdi Messi.
Futbolchi terma jamoadagi faoliyatini yakunlash qarorini Argentina safida keyingi avlod futbolchilari shakllanib kelayotgani bilan ham izohladi.
«Ortimizdan terma jamoada o‘ynashga loyiq juda iqtidorli yosh futbolchilar kelmoqda. Men esa endi jamoani tashqaridan turib qo‘llab-quvvatlayman», – dedi u.
U yaqinlariga ham rahmat aytdi
Messi, shuningdek, faoliyati davomida yonida bo‘lgan oilasi, murabbiylari, jamoadoshlari va muxlislariga minnatdorlik bildirdi.
«Bu 20 yil davomida ko‘rsatgan mehringiz uchun rahmat. Sizlar bilan birga boshdan kechirgan barcha lahzalarni o‘zim bilan olib ketaman. Argentina terma jamoasida bo‘lishni sevganman, sevaman va doimo sevaman», – deya qo‘shimcha qildi futbolchi.
Messi ushbu murojaatini Argentina terma jamoasi ishtirokidagi finaldan ikki kun o‘tib, 21 iyul kuni yozganini ma’lum qilgan. Uning so‘zlariga ko‘ra, otasi bilan bog‘liq voqeadan keyin ham bu qarorga yanada qat’iy ishonch hosil qilgan.
Messi Argentina bilan qanday sovrinlarni qo‘lga kiritgan
Lionel Messi Argentina terma jamoasi bilan bir qator yirik turnirlarda g‘olib chiqqan. U:
- 2022-yil – jahon chempioni;
- 2021 va 2024-yillar – Amerika kubogi g‘olibi;
- 2022-yil – Finalissima sohibi;
- 2008-yil – Olimpiya chempioni bo‘lgan.
Messi Argentina terma jamoasi tarixidagi eng sermahsul va sovrindor futbolchilardan biri hisoblanadi.
Avvalroq Messi faoliyatidagi jarima zarbasidan urilgan gollari sonini 74 taga yetkazib, futbol tarixidagi eng yaxshi ko‘rsatkichlar reytingida ikkinchi o‘ringa ko‘tarilgani haqida xabar berilgandi.
