Chevrolet Cobalt O‘zbekiston va boshqa bozorlarda ommabop sedanlardan biri bo‘lib qolayotgan bo‘lsa-da, avtomobil egalari va avtoblogerlar modelning ayrim kamchiliklariga ham e’tibor qaratmoqda. Avtobloger Sanat Cobalt’ning kundalik foydalanishda sezilishi mumkin bo‘lgan asosiy minuslarini sanab o‘tdi.
Uning fikricha, modelning eng ko‘p seziladigan muammolaridan biri dvigatel quvvatining yetarlicha yuqori emasligi va tezlanish dinamikasining sustligidir. Bu, ayniqsa, quvib o‘tishda va yuqori tezlikda harakatlanishda noqulaylik tug‘dirishi mumkin.
Dvigatel va dinamika asosiy e’tirozlardan biri
Avtoblogerning ta’kidlashicha, Chevrolet Cobalt kuchli dinamika kutayotgan haydovchilar uchun unchalik mos emas. Avtomobil tezlikni bosqichma-bosqich yig‘adi va keskin tezlanish talab qilinadigan vaziyatlarda yetarli chaqqonlikni bermasligi mumkin.
Bu holat trassada quvib o‘tish paytida yoki avtomobil to‘liq yuklanganida yanada sezilarli bo‘lishi mumkin.
Rul va boshqaruv elementlari hamma uchun qulay emas
U Cobalt’dagi rul va ayrim boshqaruv tutqichlarining joylashuviga ham e’tiroz bildirgan. Ayniqsa, bo‘yi baland yoki oyoqlari uzun haydovchilar uchun haydash holatini ideal tarzda moslashtirish qiyin bo‘lishi mumkin. Natijada uzoq safarlarda qulaylik pasayishi ehtimoli bor.
Osma tizimi notekis yo‘llarda zaifroq seziladi
Avtomobilning yana bir kamchiligi sifatida osma tizimi tilga olingan. Bloger fikricha, u yo‘lning katta notekisliklarini har doim ham yetarli darajada yumshata olmaydi.
Chuqurlar, keskin bo‘rtmalar va sifati past yo‘llarda zarbalar salon ichida ancha sezilishi mumkin. Bu esa uzoq muddat foydalanilganda komfortga ta’sir qiladi.
Eshiklar bilan bog‘liq muammolar kuzatilishi mumkin
Chevrolet Cobalt’da eshiklarning ochilib-yopilishida ham ayrim noqulayliklar qayd etilgan.
Haroratning keskin o‘zgarishi natijasida eshik romlari deformatsiyalanishi va bu ularning qiyin ochilishi yoki yopilishiga sabab bo‘lishi mumkinligi aytilmoqda.
Shuningdek, eshik tutqichlari vaqt o‘tishi bilan bo‘shashishi yoki mustahkamligini yo‘qotishi mumkinligi ham kamchilik sifatida ko‘rsatilgan.
Shovqin izolyatsiyasi yuqori tezlikda yetarli emas
Salon qulayligi bo‘yicha asosiy e’tirozlardan biri shovqin izolyatsiyasidir. Yuqori tezlikda g‘ildirak, yo‘l va tashqi havo shovqini salon ichiga ko‘proq kirishi mumkin. Bu ayniqsa uzoq masofali safarlarda yo‘lovchilar va haydovchi uchun sezilarli bo‘ladi.
Sovuq havoda oynalar tez terlaydi
Sovuq mavsumda oynalarning tez terlab qolishi ham modelning noqulay jihatlaridan biri sifatida tilga olingan. Bunday holatda haydovchi shamollatish va isitish tizimidan tez-tez foydalanishga majbur bo‘lishi mumkin. Bu esa qisqa masofali qatnovlarda ham qo‘shimcha noqulaylik tug‘diradi.
Salon plastiklari qattiq va tirnalishga moyil
Cobalt interyerida ishlatilgan ayrim plastik materiallar ham tanqid qilingan. Ular qattiq bo‘lib, kundalik foydalanishda oson tirnalishi mumkin. Vaqt o‘tishi bilan bu salonning tashqi ko‘rinishiga salbiy ta’sir qiladi.
Shunga qaramay, Chevrolet Cobalt amaliy va nisbatan sodda konstruksiyasi sabab ommabopligicha qolmoqda. Ammo avtomobilni tanlashda uning narxi va xizmat ko‘rsatish qulayligi bilan birga yuqoridagi kamchiliklarni ham hisobga olish maqsadga muvofiq.
Eslatib o‘tamiz, Kursiv Uzbekistan nashri Chevrolet Cobalt avtomobilining narxi keskin pasaygani haqida yozgan edi.
