Misrdagi avtobus halokatida 16 kishi halok bo‘ldi

Misr sharqida avtobus ishtirokida yuz bergan yo‘l-transport hodisasi oqibatida kamida 16 kishi halok bo‘ldi, yana 28 kishi jarohatlandi. Bu haqda mamlakat Sog‘liqni saqlash vazirligi ma’lum qildi.

Hodisa chorshanba kuni ertalab Janubiy Sinay gubernatorligidagi Dahab va Nuvayba shaharlari o‘rtasidagi yo‘lda sodir bo‘lgan.

Halok bo‘lganlar orasida Iordaniya fuqarolari ham bor

Misr va Iordaniya OAV ma’lumotiga ko‘ra, halok bo‘lganlar orasida Iordaniya fuqarolari ham bo‘lgan.

Avtobusda jami qancha yo‘lovchi bo‘lgani hozircha aniq ma’lum qilinmagan.

Jarohatlanganlarga yordam ko‘rsatish va ularni shifoxonalarga yetkazish uchun hodisa joyiga 20 ta tez yordam mashinasi yuborilgan.

Halokat sababi hozircha noma’lum

Misr Sog‘liqni saqlash vazirligi avtobusning nima sababdan halokatga uchraganini hozircha ma’lum qilmagan.

Hodisa yuz bergan Dahab va Nuvayba oralig‘idagi hudud Qizil dengiz bo‘yidagi mashhur sayyohlik yo‘nalishlaridan biri hisoblanadi va yil davomida ko‘plab xorijiy sayyohlarni jalb qiladi.

Misrda yo‘l-transport hodisalari tez-tez kuzatiladi

BBC ma’lumotiga ko‘ra, Misrda og‘ir yo‘l-transport hodisalari muntazam qayd etiladi.

Rasmiy statistikaga ko‘ra, 2025-yilda mamlakat yo‘llarida sodir bo‘lgan hodisalar oqibatida qariyb 6 ming kishi halok bo‘lgan.

Bunday avariyalarning asosiy sabablari sifatida ko‘pincha ehtiyotsiz haydash va yo‘llarning qoniqarsiz holati ko‘rsatiladi.

Eslatib o‘tamiz, Kursiv Uzbekistan nashri Misrda 5,6 magnitudali zilzila sodir bo‘lgani haqida yozgan edi.