Xiaomi yangi bukiluvchi flagmani Xiaomi 18 Fold modelini uchta asosiy Leica kamerasi bilan jihozlaydi. Kompaniya rahbari Lu Veybing ma’lum qilishicha, smartfonda turli masofalarda sifatli suratga olishga mo‘ljallangan kamera tizimi qo‘llanadi.
Yangi modelda asosiy e’tibor yuqori aniqlik, optik zum va keng burchakli tasvirga qaratiladi.
Asosiy kamera 200 Mp bo‘ladi
Xiaomi 18 Fold’ning bosh kamerasi 200 Mp aniqlikdagi Leica moduli bo‘ladi. U 1/1,56 dyuymli yirik sensor bilan jihozlanadi.
Leica Summilux obyektivi esa tasvirlarning tiniqligi va detalliligini oshirishga xizmat qilishi kutilmoqda.
3,5 karra optik zumli periskop kamera qo‘shiladi
Ikkinchi kamera 50 Mp Leica periskop teleobyektivi bo‘ladi. U 3,5 karra optik zum imkoniyatini taqdim etadi.
Manbaga ko‘ra, ushbu kamera portretlar bilan birga uzoqdagi obyektlar va manzaralarni suratga olish uchun ham mo‘ljallangan.
Uchinchi kamera ham 50 Mp
Xiaomi 18 Fold’ning uchinchi asosiy kamerasi 50 Mp aniqlikdagi ultra keng burchakli modul bo‘ladi.
U oddiy kameraga qaraganda kengroq ko‘rish maydonini qamrab olib, guruhli suratlar, arxitektura va manzaralarni olishda qo‘l kelishi mumkin.
Eslatib o‘tamiz, Kursiv Uzbekistan Xiaomi 18 Fold smartfonining kamerasi namoyish etilgani haqida yozgan edi.
