Xiaomi’ga tegishli Poco brendi Hindistonda X8 Power smartfonini taqdim etdi. Qurilmaning asosiy xususiyati 10 000 mA/soat sig‘imli batareya bo‘lib, u 100 Vt tezkor quvvatlashni qo‘llab-quvvatlaydi va boshqa qurilmalarni ham quvvatlay oladi, deya xabar berdi Gizmochina.
Poco X8 Power kremniy-uglerodli akkumulyator bilan jihozlangan. Shunga qaramay, smartfon korpusining qalinligi 8,65 millimetrni tashkil etadi. Qurilmaning og‘irligi 229 gramm. Taqqoslash uchun, 5 500 mA/soat batareyali Poco X7 modeli 190 gramm edi.
Smartfon powerbank sifatida ham ishlaydi
X8 Power 100 Vt quvvatli HyperCharge tezkor quvvatlash texnologiyasini qo‘llab-quvvatlaydi.
Bundan tashqari, smartfon boshqa qurilmalarni kabel orqali 27 Vt gacha quvvat bilan zaryadlay oladi. Shu tariqa undan powerbank sifatida ham foydalanish mumkin.
6,83 dyuymli AMOLED ekran o‘rnatilgan
Smartfon 6,83 dyuymli AMOLED displeyga ega. Ekran 1,5K aniqlik, 120 Gts yangilanish tezligi va 3 500 nitgacha maksimal yorqinlikni qo‘llab-quvvatlaydi. Shuningdek, HDR10+ va Dolby Vision texnologiyalari mavjud.
Displey Gorilla Glass Victus 2 himoya oynasi bilan qoplangan. Wet Touch 2.0 texnologiyasi esa ekranni ho‘l barmoqlar bilan ham boshqarish imkonini beradi.
Snapdragon 6 Gen 5 protsessorida ishlaydi
Poco X8 Power Snapdragon 6 Gen 5 protsessori bilan jihozlangan. Smartfonning old kamerasi 32 MP. Orqa tomonda esa 50 MP asosiy va 8 MP qo‘shimcha kameradan iborat tizim joylashgan.
Qurilmada stereo karnaylar va ekran ostiga joylashtirilgan barmoq izi skaneri ham mavjud.
Suv va changdan IP69K darajasida himoyalangan
Poco X8 Power IP69K himoya standartiga ega. Bu qurilmaning chang va suv ta’siriga yuqori darajada chidamliligini anglatadi.
Smartfon Android 16 asosidagi HyperOS 3 tizimida ishlaydi. Kompaniya model uchun to‘rtta yirik Android yangilanishi va olti yil davomida xavfsizlik yangilanishlarini taqdim etishni va’da qilgan.
Narxi $350 dan boshlanadi
Poco X8 Power Hindistonda 36 ming rupiy, ya’ni taxminan $380 narxda sotiladi. Dastlabki xaridorlar uchun esa narx 33 ming rupiy yoki qariyb $350 etib belgilangan.
Smartfon savdosi 11-sentabrdan Flipkart platformasida boshlanadi.
Eslatib o‘tamiz, avvalroq Poco F9 Ultra va F9 Pro sotuvga chiqqani ma’lum qilingandi. Har ikki model Snapdragon 8 Elite Gen 5 protsessori, 200 MP asosiy kamera, 185 Gts gacha yangilanish tezligiga ega AMOLED ekran va IP68 himoyasini taklif qiladi.
