Lionel Messi va Krishtianu Ronaldu Karlos Tevesning futbolchilik faoliyatidagi xayrlashuv uchrashuvida ilk bor bir jamoada maydonga tushishi mumkinligi haqidagi xabarlar ijtimoiy tarmoqlarda keng tarqaldi. Biroq bu ma’lumot hozircha rasman tasdiqlanmagan, deya xabar berdi Sports Yahoo nashri.
Mish-mish qanday tarqaldi
Karlos Teves 2026-yil aprel oyida Olga striming xizmatiga bergan intervyusida xayrlashuv uchrashuvida Messi va Ronalduni birga ko‘rishni istashini aytgan.
Undan Messi va Ronaldu ushbu o‘yinda qatnashadimi, deb so‘ralganda, Teves qisqa qilib: «Biz ularni bir joyga yig‘amiz», degan.
Biroq 6-sentabr kuni X ijtimoiy tarmog‘idagi bir akkaunt ushbu videoni qayta tarqatib, Tevesning so‘zlarini noto‘g‘ri inglizcha tarjima qilgan. Tarjimada go‘yoki Messi va Ronaldu uchrashuvda ishtirok etishga rozilik bergani aytilgan.
Ushbu soxta tarjima qisqa vaqt ichida milliondan ortiq marta ko‘rilgan.
Messi va Ronaldu hali bir jamoada o‘ynamagan
Teves aslida ikki futbolchining xayrlashuv uchrashuvida qatnashishi rasman tasdiqlanganini aytmagan. Messi va Ronaldu faoliyati davomida, jumladan, o‘rtoqlik uchrashuvlarida ham bir jamoa safida maydonga tushmagan.
Tevesning rasmiy xayrlashuv uchrashuvi 2026-yil dekabr oyida Buenos-Ayresdagi «La Bombonera» stadionida o‘tkazilishi rejalashtirilgan. Shu sababli Messi va Ronalduning o‘yinda ishtirok etishi bo‘yicha hali yakuniy qaror e’lon qilinmagan.
Teves ikki yulduz bilan ham birga o‘ynagan
Karlos Teves Krishtianu Ronaldu bilan «Manchester Yunayted» safida 2007 – 2009-yillarda birga o‘ynagan. Ular ushbu davrda 80 ta uchrashuvda jamoadosh bo‘lgan.
Teves Lionel Messi bilan esa Argentina terma jamoasida 10 yil davomida 52 ta o‘yinda birga maydonga tushgan. Ularning terma jamoadagi dastlabki 30 ta uchrashuvida hamkorlikda 19 ta golga hissa qo‘shgan.
Shu bois Teves Messi va Ronalduni bir maydonda bir jamoa sifatida birlashtirishi mumkin bo‘lgan futbolchilardan biri sifatida ko‘rilmoqda. Biroq hozircha ikki futbolchining Tevesning xayrlashuv uchrashuvida qatnashishi rasman tasdiqlanmagan.
Avvalroq Kursiv Uzbekistan «Manchester Siti» Chempionlar ligasi oldidan Husanov bo‘yicha qaror qabul qilgani haqida yozgandi.
