Buyuk Britaniya G‘arbiy Sohildagi Isroil manzilgohlariga savdo taqiqi joriy qiladi

Buyuk Britaniya bosib olingan G‘arbiy Sohildagi Isroil manzilgohlarida ishlab chiqarilgan mahsulotlar importini taqiqlashini ma’lum qildi. Bu haqda DW xabar bermoqda.

London, shuningdek, manzilgohlar kengayishiga xizmat ko‘rsatayotgan ayrim kompaniya va shaxslarga nisbatan sanksiyalar joriy etishni rejalashtirmoqda.

Buyuk Britaniya tashqi ishlar vaziri Ed Miliband bu haqda Jamoatlar palatasidagi chiqishida ma’lum qildi. Hukumat ushbu choralarni ikki davlat tamoyiliga asoslangan yechimni qo‘llab-quvvatlash siyosatining bir qismi sifatida izohlamoqda.

Manzilgohlardan mahsulot olib kirish taqiqlanadi

Milibandning aytishicha, Buyuk Britaniya bosib olingan hududlardagi noqonuniy manzilgohlarda ishlab chiqarilgan tovarlarga import taqiqini joriy etadi.

Bundan tashqari, manzilgohlar qurilishi va kengayishiga yordam berayotgan kompaniya va shaxslar ham Londonning e’tiboriga tushadi. Gap qurilish, infratuzilma, moliyalashtirish hamda ko‘chmas mulk bilan bog‘liq xizmatlar haqida ketmoqda.

Tashqi ishlar vaziri noqonuniy manzilgohlarni moliyalashtirayotgan yoki ularga ko‘maklashayotgan shaxslar Britaniya sanksiyalariga duch kelishini ta’kidladi.

Yana 11 davlat ham cheklovlarni rejalashtirmoqda

Buyuk Britaniyaning qarori boshqa Yevropa va G‘arb davlatlarining shu yo‘nalishdagi harakatlari bilan bir vaqtda e’lon qilindi.

Qo‘shma bayonotga ko‘ra, Kanada, Daniya, Finlyandiya, Fransiya, Islandiya, Irlandiya, Norvegiya, Polsha, Portugaliya, Ispaniya va Shvetsiya ham Isroil manzilgohlari bilan savdoni cheklash choralarini ko‘rishni rejalashtirmoqda.

Yevropa Ittifoqi vakili esa blok ekstremistik kayfiyatdagi ayrim ko‘chmanchilar va ular bilan bog‘liq tuzilmalarga qarshi avvalroq uchta sanksiya paketi qabul qilganini bildirgan.

Avvalroq «Kursiv» Netanyaxu Eron rejimi tez orada qulashini aytgani haqida yozgan edi.