Chevrolet 2027-yilgi Chevrolet Bolt elektromobili uchun 2026-yil sentabr oyiga mo‘ljallangan yangi moliyaviy takliflarni e’lon qildi. Bu haqda GMAutority nashri xabar bermoqda.
Takliflar 30-sentabrgacha amal qiladi va ayrim shartlar faqat GM Financial orqali moliyalashtirishda qo‘llanadi.
Kredit foizi 0,9 foizdan boshlanadi
2027-yilgi Chevrolet Bolt’ni kredit asosida xarid qiluvchilar uchun 36 oyga 0,9 foizli, 60 oyga esa 2,9 foizli yillik stavka taklif qilinmoqda.
Ushbu shartlardan foydalanish uchun avtomobil GM Financial orqali moliyalashtirilishi kerak. Shu bilan birga, sentabr oyida Bolt uchun naqd xaridga qo‘shimcha chegirma mavjud emas.
Bolt LT oyiga $419 evaziga lizingga beriladi
Chevrolet Bolt LT uchun butun AQSh bo‘ylab lizing dasturi ham taqdim etilgan.
Unga ko‘ra, avtomobilni 36 oy davomida oyiga $419 evaziga lizingga olish mumkin. Dastur yiliga 10 ming milgacha yurishga mo‘ljallangan.
Oddiy xaridorlar shartnoma imzolash vaqtida $5,1 ming, GM kompaniyasining amaldagi xodimlari va imtiyozli oila a’zolari esa $4,1 ming boshlang‘ich to‘lov qilishi kerak bo‘ladi.
Har ikkala holatda ham garov depoziti talab etilmaydi.
Narxi $29 mingdan boshlanadi
2027-yilgi Chevrolet Bolt ikki asosiy komplektatsiyada sotiladi. Bolt LT narxi $28,995 dan, Bolt RS esa $32,995 dan boshlanadi. Ushbu narxlarga $1,395 miqdoridagi yetkazib berish to‘lovi ham kiritilgan.
Chevrolet Bolt ayni paytda AQSh bozoridagi eng arzon yangi elektromobillardan biri sifatida pozitsiyalanmoqda.
210 ot kuchi va 421 km yurish zaxirasi
Yangi Bolt Chevrolet Equinox EV’da qo‘llanadigan elektr motor bilan jihozlangan. Uning quvvati 210 ot kuchini tashkil qiladi va model faqat old g‘ildirakdan tortuvchi tizim bilan ishlab chiqariladi.
Elektromobilning bir quvvatlashdagi yurish zaxirasi 262 mil, ya’ni taxminan 421 kmni tashkil qiladi.
Bolt’ga 65 kVt/soat sig‘imli LFP batareya o‘rnatilgan. U 150 kVtgacha tezkor quvvatlashni qo‘llab-quvvatlaydi va batareyani 10 foizdan 80 foizgacha taxminan 26 daqiqada quvvatlash mumkin.
Tesla Supercharger tarmog‘idan ham foydalanadi
2027-yilgi Chevrolet Bolt NACS quvvatlash portiga ega. Bu esa avtomobilga Tesla Supercharger tarmog‘idan foydalanish imkonini beradi.
CCS standartidagi quvvatlash stansiyalaridan foydalanish uchun esa alohida adapter taklif qilinadi.
Super Cruise tizimi ham mavjud bo‘ladi
Chevrolet Bolt LT va RS versiyalarida GM’ning Super Cruise yarim avtonom haydovchi yordamchisi ham mavjud bo‘lishi kutilmoqda.
U avtomobilga avtomagistralda ayrim holatlarda qo‘llarni ruldan olgan holda harakatlanish, yo‘l bo‘ylab polosalarni almashtirish va navigatsiya yo‘nalishiga mos yurishga yordam beradi.
RS komplektatsiyasida haydovchi va old yo‘lovchi o‘rindiqlari isitish va shamollatish funksiyasiga standart ravishda ega.
Bolt ishlab chiqarilishi 2027-yilda tugashi mumkin
Shunga qaramay, Chevrolet Bolt’ning yangi avlodi uzoq ishlab chiqarilmasligi kutilmoqda. GM rejasiga ko‘ra, modelning ishlab chiqarilishi 2027-yilda, Kansas shtatidagi Fairfax zavodida taxminan 18 oylik ishlab chiqarish davridan so‘ng yakunlanishi mumkin.
Bo‘shagan ishlab chiqarish quvvatlari esa benzinli avtomobillarga yo‘naltiriladi. Sentabrdagi barcha moliyaviy takliflar 2026-yil 30-sentabrgacha amal qiladi. Ayrim xaridorlar dastur shartlariga mos kelmasligi mumkin va mahalliy dilerlarda qo‘shimcha chegirmalar bo‘lishi ehtimoli bor.
Eslatib o‘tamiz, Kursiv Uzbekistan nashri bir qator avtomobillarda motor moyi qanday almashtirilishi haqida yozgan edi.
