Vivo kompaniyasi yangi Vivo X500 flagman smartfonlari seriyasi 21-sentabr kuni Xitoyda rasman taqdim etilishini tasdiqladi. Bu haqda «Gizmochina» nashri xabar bermoqda.
Kompaniya Yantay shahrida o‘tkazilgan Creator Festival tadbirida yangi qurilmalarning kamera imkoniyatlari haqida ham dastlabki tafsilotlarni ochiqladi.
Yangi liniyada asosiy urg‘u mobil fotografiya va video imkoniyatlariga qaratilgan. X500 Pro seriyasida yangi sensorlar, kuchli stabilizatsiya, yuqori tezlikdagi 4K video va sun’iy intellektga asoslangan tasvirga ishlov berish funksiyalari bo‘lishi kutilmoqda.
X500 Pro yangi BluePrint LightGuard 900 sensorini oladi
Vivo ma’lumotiga ko‘ra, X500 Pro seriyasi dunyoda birinchi bo‘lib yangi BluePrint LightGuard 900 sensoridan foydalanadi.
Mazkur sensor Sony LYT-910 asosida yaratilgan bo‘lishi mumkin. Vivo’ning yuqori dinamik diapazon texnologiyasi bilan birgalikda kamera 17EV gacha dinamik diapazonni ta’minlashi aytilmoqda.
Bu, ayniqsa, yorug‘ va qorong‘i qismlar bir kadrda birga tushadigan murakkab sahnalarda tafsilotlarni yaxshiroq saqlashga yordam berishi kerak.
4K videoni 240 kadr/soniyada yozadi
X500 Pro seriyasining video imkoniyatlari ham sezilarli darajada kuchaytiriladi.
Smartfonlar 4K formatda 240 kadr/soniyagacha sekinlashtirilgan video, shuningdek, 4K 120 kadr/soniyali HDR video yozishni qo‘llab-quvvatlashi kutilmoqda.
Bundan tashqari, Vivo VCS 4.0 texnologiyasi kam yorug‘lik sharoitida tasvir sifatini yaxshilash uchun ishlatiladi.
Asosiy va periskop telefoto kameralar CIPA 7-darajali stabilizatsiyani qo‘llab-quvvatlaydi.
X500 Pro Max 200 MP telefoto kameraga ega bo‘lishi mumkin
Dastlabki ma’lumotlarga ko‘ra, standart Vivo X500 1/1,28 dyuymli LYTIA-828 asosiy sensori, LYTIA-610 telefoto kamerasi va 50 MP ultra keng burchakli kamera bilan jihozlanadi.
X500 Pro’da ham LYTIA-610 telefoto kamera ishlatilishi kutilmoqda.
Eng yuqori X500 Pro Max esa 200 MP HP0 telefoto sensori bilan ajralib turishi mumkin. Unga 50 MP asosiy va 50 MP ultra keng burchakli kameralar ham qo‘shiladi.
AI suratga olish bo‘yicha tavsiya beradi
Vivo X500 seriyasiga yangi sun’iy intellekt yordamchisi ham qo‘shiladi. U kadrni tahlil qilib, foydalanuvchiga mos kamera rejimi, kompozitsiya va poza bo‘yicha tavsiyalar bera oladi.
Shuningdek, albom asosidagi AI tahrirlash funksiyasi suratdagi sahnaga qarab individual rang sozlamalarini qo‘llash imkonini beradi.
10-bit video va ACES rang tizimi
X500 seriyasi videoyozuvda 10-bit 4:2:2 kodlash va ACES rang tizimini qo‘llab-quvvatlaydi.
Pro modellarda 4K 120 kadr/soniyali 10-bit Log video yozish imkoniyati bo‘lishi kutilmoqda. Vivo, shuningdek, 8K native Live chiqishi va AI yordamidagi video funksiyalarini ham namoyish qilgan.
Eslatib o‘tamiz, Kursiv Uzbekistan nashri Vivo X500 Pro Max videotasvir imkoniyatlari namoyish etilgani haqida yozgan edi.
