Avtoekspert Kamol Sulaymonov yangi haydovchilar uchun qaysi avtomobillar ko‘proq mos kelishini aytdi. Uning fikricha, birinchi mashinani tanlashda konstruksiyasi sodda, ko‘rinishi yaxshi va texnik xizmat ko‘rsatish oson bo‘lgan avtomobillarga e’tibor berish kerak.
Ekspert yangi haydovchilar uchun Chevrolet Cobalt, Spark va Nexia 3’ni mos modellar sifatida ko‘rsatdi. Shuningdek, muqobil variant sifatida elektromobillarni ham ko‘rib chiqishni tavsiya qildi.
Parkovka uchun Spark, soddalik uchun Cobalt
Sulaymonovning so‘zlariga ko‘ra, Chevrolet Cobalt yangi haydovchi uchun eng maqbul variantlardan biri bo‘lib qolmoqda. Bu model O‘zbekistonda keng tarqalgan, konstruksiyasi nisbatan sodda. Shu sababli avtomobilga texnik xizmat ko‘rsatish va uni ta’mirlashda odatda jiddiy qiyinchiliklar yuzaga kelmaydi.
Yana bir variant — Chevrolet Nexia 3. Avtomobil murakkab elektron qurilmalar ko‘p bo‘lmagan sodda konstruksiyaga ega. Model 1,5 litrli benzin dvigateli, mexanik yoki avtomatik uzatmalar qutisi bilan jihozlangan.
Ekspert Chevrolet Spark’ni ham yangi haydovchilar uchun mos deb hisoblaydi. Uning asosiy afzalligi — haydovchiga yaxshi ko‘rinish imkonini berishi. Bundan tashqari, avtomobilning ixcham o‘lchamligi tor ko‘chalarda harakatlanish va parkovka qilishni osonlashtiradi.
Yangi boshlovchi haydovchilar Chevrolet Lacetti/Gentra’ni ham ko‘rib chiqishi mumkin. Biroq avtomobil o‘lchamlari kattaroq bo‘lgani sababli shaharda parkovka qilish va manevrlarni bajarishga ko‘nikish uchun biroz ko‘proq vaqt talab etiladi.
Yana bir variant — Chevrolet Onix. Biroq bu sedan tanlanayotganda uning zamonaviy elektron tizimlari va turbinali dvigateli ko‘proq e’tibor bilan texnik xizmat ko‘rsatishni talab qilishini hisobga olish kerak.
Elektromobil sotib olishdan oldin nimalarga e’tibor berish kerak
Elektromobillar ham alohida variant sifatida ko‘rib chiqilishi mumkin. Avtoekspertning ta’kidlashicha, texnik xizmat bilan tez-tez shug‘ullanishni istamaydigan haydovchilar uchun elektromotorning muhim afzalligi bor: unda ichki yonuv dvigateliga qaraganda mexanik qismlar ancha kam.
Kundalik foydalanishda avtomobilni tez-tez yoqilg‘i quyish shoxobchasiga olib borish shart emas. Agar uyda quvvatlash qurilmasini o‘rnatish imkoniyati bo‘lsa, avtomobilni kechqurun quvvatlashga qo‘yib, ertalab zaryadi to‘liq avtomobildan foydalanish mumkin. Bu ayniqsa shaharda qulay: quvvatlash uchun alohida joyga borish o‘rniga bu jarayon kundalik uy tartibining bir qismiga aylanadi.
Nisbatan hamyonbop elektromobil sifatida BYD Seagull’ni ko‘rib chiqish mumkin. Ishlab chiqaruvchi ma’lumotlariga ko‘ra, avtomobilning yurish masofasi 405 km gacha yetadi. Tezkor quvvatlash orqali batareyani 30 foizdan 80 foizgacha taxminan 33 daqiqada quvvatlash mumkin.
Shu bilan birga, elektromobil ham muntazam texnik xizmat ko‘rsatishni talab qiladi. Avtomobil egasi tormozlar, shinalar, osma qismlar, konditsioner va akkumulyator holatini nazorat qilib borishi kerak. Xarid qilishdan oldin quvvatlash masalasini hal qilish va avtomobilning yurish zaxirasi kundalik safarlar uchun yetarlimi yoki yo‘qmi, baholash lozim.
Ayni paytda Chevrolet Cobalt uchun 10-sentabrgacha 15 mln so‘mlik rasmiy chegirma amal qilmoqda. Chegirmadan keyin avtomobil narxi 146,1 mln so‘mni tashkil etadi.
