General Motors ayrim yangi Chevrolet Equinox avtomobillarida old osma qismidan noodatiy taqillash ovozi chiqishi mumkinligini ma’lum qildi. Bu haqda GMAutority nashri xabar bermoqda.
Hujjat Shimoliy Amerikada sotilgan 2025, 2026 va 2027-yilgi Chevrolet Equinox avtomobillarini qamrab oladi. Muammo dvigatel yoki transmissiyaning muayyan turiga bog‘lanmagan.
Ovoz qaysi holatlarda paydo bo‘ladi
GM ma’lumotiga ko‘ra, ayrim Equinox avtomobillarida mashina to‘liq to‘xtashidan biroz oldin old tomondan taqillash ovozi eshitilishi mumkin.
Xuddi shunday tovush avtomobil joyidan qo‘zg‘alayotganda yoki past tezlikda burilish vaqtida ham paydo bo‘lishi mumkin.
Kompaniyaning dastlabki xulosasiga ko‘ra, shovqinning manbai oldingi pastki richagning orqa vtulkasi bo‘lishi ehtimoli bor.
GM hozircha ta’mirlash usulini e’lon qilmagan
Dastlabki servis byulletenida nosozlikni bartaraf etish uchun aniq ta’mirlash yoki detalni almashtirish tartibi ko‘rsatilmagan.
Agar dilerlik markazi mutaxassislari mijoz avtomobilida aynan shu holat mavjudligini tasdiqlasa, ular egasiga General Motors muhandislari yechim ustida ishlayotganini ma’lum qilishi kerak.
GM hozircha bunday avtomobillardan odatdagi tartibda foydalanishni davom ettirish mumkinligini bildirgan.
Muammo xavfsizlikka ta’sir qilmaydi
Avtomobil ishlab chiqaruvchisining ta’kidlashicha, mazkur taqillash bilan avtomobildan foydalanishda davom etish xavfsizlik yoki uzoq muddatli chidamlilik bilan bog‘liq muammolarni keltirib chiqarmaydi.
Shuningdek, PIT6542 hujjati avtomobillarni qaytarib chaqirish kampaniyasi hisoblanmaydi. Ya’ni General Motors hozircha Chevrolet Equinox egalari uchun ommaviy servis chaqiruvi e’lon qilmagan.
Yakuniy yechim keyinroq taqdim etiladi
General Motors muammoning aniq yechimi ishlab chiqilgach, dastlabki servis byulletenini yangilashi yoki uning o‘rniga to‘liq texnik servis byulletenini chiqarishini ma’lum qildi. Hozircha yakuniy ta’mirlash tartibi qachon tayyor bo‘lishi haqida muddat berilmagan.
Shu sababli ushbu muammo kuzatilgan Equinox egalari avtomobilni dilerlik markazida tekshirtirishi mumkin, biroq ishlab chiqaruvchining rasmiy tuzatish usuli hali e’lon qilinmagan.
Eslatib o‘tamiz, Kursiv Uzbekistan nashri Chevrolet yana bir avtomobiliga chegirma e’lon qilgani haqida yozgan edi.
