Apple kompaniyasi iPhone 18 Pro va iPhone 18 Pro Max flagman smartfonlarini rasman taqdim etdi. Yangi avlod A20 Pro protsessori, sun’iy intellekt imkoniyatlari kengaytirilgan Siri, yangilangan kamera tizimi va tezroq quvvatlash texnologiyasiga ega bo‘ldi.
iPhone 18 Pro narxi $1200 dan, iPhone 18 Pro Max esa $1300 dan boshlanadi. Qurilmalar orasida 2 TB ichki xotiraga ega versiyalar ham mavjud.
A20 Pro 2 nanometrli texprotsessda ishlab chiqarildi
Yangi flagmanlarning asosini Apple A20 Pro chipi tashkil qiladi. U 2 nanometrli texnologik jarayon asosida ishlab chiqarilgan.
Kompaniya yangi protsessor avvalgi avlodga nisbatan unumdorlik va energiya samaradorligini oshirishini ma’lum qildi. Apple qurilmalarning sovitish tizimini ham takomillashtirganini qayd etdi.
iPhone 18 Pro va Pro Max to‘rtta rangda sotiladi. Asosiy yangi rang «Dark Cherry» – to‘q olcha tusidagi variant bo‘ldi. Shuningdek, kumush, qora va och ko‘k ranglar mavjud. Avvalgi avloddagi yorqin to‘q sariq rang yangi qatordan chiqarib tashlangan.
Apple yangi Siri’ga katta urg‘u berdi
Taqdimotda asosiy e’tibor sun’iy intellekt imkoniyatlariga qaratildi. Yangilangan Siri foydalanuvchi bilan tabiiyroq muloqot qilish va bir-biriga bog‘langan murakkab topshiriqlarni ketma-ket bajarish imkoniyatiga ega bo‘ldi.
Apple yangi Siri’ni Google va OpenAI kabi kompaniyalar bilan sun’iy intellekt bozoridagi raqobatning muhim vositalaridan biri sifatida ko‘rsatmoqda.
Hozircha yangilangan Siri imkoniyatlarida rus tili qo‘llab-quvvatlanmaydi.
Asosiy kamerada ilk bor o‘zgaruvchan diafragma paydo bo‘ldi
iPhone 18 Pro avlodidagi muhim yangiliklardan biri 48 MP asosiy kameraning o‘zgaruvchan diafragma bilan jihozlangani bo‘ldi.
Bu iPhone Pro qatorida ilk marta foydalanuvchiga kamera sensoriga qancha yorug‘lik tushishini va fonning qay darajada xiralashishini boshqarish imkonini beradi. Bunday yechim smartfon kamerasi sozlamalarini professional kameralarga yaqinlashtiradi.
Apple surat olingandan keyin ham uning bir qator parametrlarini o‘zgartirish imkoniyatini qo‘shganini ma’lum qildi.
Dynamic Island kichraytirildi
Apple iPhone 18 Pro va Pro Max’dagi Dynamic Island hududini ham kichraytirdi.
Yangilangan Dynamic Island bir vaqtning o‘zida uchta ilovaga oid ma’lumotlarni aks ettira oladi. Shu orqali ekran maydonidan samaraliroq foydalanish ko‘zda tutilgan.
15 daqiqada 50 foizgacha quvvatlanadi
Yangi iPhone’larda quvvatlash tezligi ham oshirilgan. Apple ma’lumotiga ko‘ra, mos quvvatlagichdan foydalanilganda smartfon batareyasini 15 daqiqada 50 foizgacha to‘ldirish mumkin.
Kompaniya iPhone 18 Pro avtonomligini iPhone 17 Pro Max darajasiga olib chiqqanini bildirdi. iPhone 18 Pro Max uchun video tomosha qilish vaqti 45 soatgacha yetishi aytilmoqda.
Shu bilan birga, Apple umumiy foydalanish bo‘yicha iPhone 18 Pro uchun 24 soatgacha, Pro Max uchun esa 30 soatgacha ishlash vaqtini ko‘rsatgan.
iPhone 18 Pro narxi qancha
iPhone 18 Pro’ning boshlang‘ich narxi $1200 etib belgilandi. Kattaroq iPhone 18 Pro Max esa $1300 dan sotuvga chiqariladi.
Apple yangi avlodda 2 TB gacha ichki xotira taklif qilmoqda. Kompaniya bu yilgi Pro modellarida protsessor quvvati va kameradan tashqari, sun’iy intellekt, avtonomlik va tezkor quvvatlashga ham katta urg‘u berdi.
Eslatib o‘tamiz, Kursiv Uzbekistan nashri iPhone 17 Pro’ga o‘xshaydigan HMD Asha 305 taqdim etilgani haqida yozgan edi.
