Apple 9-sentabr kuni taqdim etgan iPhone 18 Pro va iPhone 18 Pro Max modellari Toshkentdagi «Malika» bozorida oktabr oyida yetib kelishi kutilmoqda. Mahalliy sotuvchilarga ko‘ra, dastlabki partiyalarda yangi iPhone narxiga $800–1000 gacha ustama qo‘shilishi mumkin.
Apple’ning yangi smartfonlari AQShda 18-sentabrdan sotuvga chiqadi. Qurilmalarga oldindan buyurtma 12-sentabrdan boshlangan.
«Malika»da iPhone 18 Pro $1,9 mingdan sotilishi mumkin
Kursiv Uzbekistan so‘roviga ko‘ra, Toshkentdagi «Malika» bozori sotuvchilari iPhone 18 Pro va Pro Max’ning dastlabki partiyalari AQShdagi rasmiy narxlardan sezilarli qimmatroq bo‘lishini kutmoqda.
AQShda iPhone 18 Pro narxi $1 199, iPhone 18 Pro Max esa $1 299 dan boshlanadi. Har ikki model 256 GB xotira bilan taqdim etiladi. Shuningdek, 512 GB, 1 TB va 2 TB xotirali versiyalar ham mavjud.
Sotuvchilar hisob-kitobiga ko‘ra, dastlab iPhone 18 Pro uchun taxminan $800, Pro Max uchun esa qariyb $1 ming ustama qo‘shilishi mumkin.
Shu sababli Toshkentdagi dastlabki partiyalarning taxminiy narxi:
- iPhone 18 Pro — $1,9 ming atrofida;
- iPhone 18 Pro Max — $2,29 ming atrofida.
Sotuvchilarning fikricha, narxlarning yuqoriligi dastlabki kunlardagi talab va cheklangan taklif bilan bog‘liq. Keyinchalik yetkazib berish barqarorlashishi va xaridorlar qiziqishi pasayishi bilan narxlar ham tushishi mumkin.
iPhone 18 Pro’da qanday o‘zgarishlar bor?
Yangi Pro modellari 2 nanometrli texnologiya asosida ishlab chiqarilgan A20 Pro chipi bilan jihozlangan. Apple chip yuqori unumdorlik va sun’iy intellekt vazifalarida yaxshilangan ishlashni ta’minlashini bildirgan.
Smartfonlarda yangi sovitish tizimi ham qo‘llangan. Uzoq davom etadigan yuklamalar vaqtida qurilmaning qizib ketishini kamaytirish maqsadida bug‘ kamerasi takomillashtirilgan.
Kameralar tizimida ham sezilarli yangiliklar bor. Asosiy 48 MP Fusion kamera o‘zgaruvchan diafragmaga ega. Shuningdek, 48 MP ultra keng burchakli kamera va 4 karra optik yaqinlashtirishni ta’minlovchi 48 MP telekamera o‘rnatilgan. Old kamera esa 18 MP.
Pro Max 45 soatgacha video ko‘rsatadi
iPhone 18 Pro 6,3 dyuymli Super Retina XDR OLED displeyga ega. Pro Max modelida ekran diagonali 6,9 dyuymni tashkil qiladi. Har ikki modelda 120 Hz gacha ProMotion, Always-On Display va Dynamic Island funksiyalari mavjud.
Apple ma’lumotlariga ko‘ra, iPhone 18 Pro video ko‘rishda 36 soatgacha, Pro Max esa 45 soatgacha ishlashi mumkin. Pro Max’da bu avvalgi avlodga nisbatan 6 soat ko‘proq.
Smartfonlar qora, kumushrang, Glacier va bordo ranglarda ishlab chiqariladi. Xotira hajmi 256 GBdan boshlanib, 2 TBgacha yetadi.
Yangi modellarda Wi-Fi 7, Bluetooth 6 va Apple’ning C2 modemi ham qo‘llangan.
iPhone 17 egalari yangi modelga shoshilmasligi mumkin
«Malika»dagi sotuvchilar iPhone 17 egalari yangi Pro modellarga darhol o‘tishini tavsiya qilmayapti. Ularning fikricha, oddiy foydalanuvchi uchun 17-seriyadan iPhone 18 Pro yoki Pro Max’ga o‘tish kundalik foydalanishda yuqori narxni oqlaydigan darajada katta farq bermasligi mumkin.
Shu sababli yangi modelni Toshkentda ilk bo‘lib sotib olish, asosan, eng yangi iPhone’ni boshqalardan oldin ishlatishni istagan xaridorlar uchun qiziq.
Sotuvchilar narxga tejamkorlik bilan yondashadigan xaridorlarga esa dekabrgacha kutishni tavsiya qilmoqda. Ularning prognoziga ko‘ra, yil oxiriga borib dastlabki shov-shuv pasayadi va yangi iPhone narxlari ham tushishi mumkin.
Avvalroq Kursiv Uzbekistan O‘zbekistonda foydalanilgan iPhone’larning sentabr boshidagi narxlarini tahlil qilgandi.
