KIND korporatsiyasi Toshkentning yangi aeroporti loyihasida qatnashishi mumkin

Prezident Shavkat Mirziyoyev Janubiy Koreyaga tashrifi doirasida KIND korporatsiyasi bosh ijrochi direktori Kim Bok Xvan bilan uchrashdi. Muzokaralarda Toshkentning yangi xalqaro aeroporti atrofidagi hududni rivojlantirish bo‘yicha master-reja ishlab chiqish masalasi muhokama qilindi.

Tomonlar transport va ijtimoiy infratuzilmani rivojlantirish bo‘yicha hamkorlikni kengaytirishga e’tibor qaratdi.

Aeroport atrofida yagona tizim yaratilishi mumkin

Uchrashuvda yangi xalqaro aeroport atrofidagi hududni rivojlantirish uchun master-reja ishlab chiqish zarurligi qayd etildi.

Rejada aeroport, zamonaviy logistika xablari va turarjoy infratuzilmasini yagona tizimga birlashtirish ko‘zda tutilmoqda.

KIND bilan bo‘lib o‘tgan muzokaralar ushbu yo‘nalishdagi hamkorlikni kengaytirish imkoniyatlari ko‘rib chiqilayotganini ko‘rsatadi.

Shuningdek, o‘qing: Hyundai, Kia va Hyundai Rotem O‘zbekistondagi loyihalarini kengaytiradi

Qo‘shma investitsiya platformasi tashkil qilindi

Tomonlar O‘zbekiston va KIND o‘rtasida qo‘shma investitsiya platformasi tashkil etilganini olqishladi.

Platforma kelgusida transport, infratuzilma va boshqa yirik loyihalarni moliyalashtirish va amalga oshirishga xizmat qilishi mumkin.

Bioklaster loyihasi ham muhokama etildi

Uchrashuvda yangi ilmiy-sanoat bioklasterini tashkil qilish loyihasi ham ko‘rib chiqildi.

Unda ilm-fan, sanoat va zamonaviy texnologiyalarni birlashtiruvchi yagona ekotizim yaratish muhimligi ta’kidlandi.

Eslatib o‘tamiz, avvalroq Lotte Group O‘zbekistondagi turizm markazlarini boshqarishi mumkinligi haqida xabar berilgandi.