O‘zbekistonning shaxmat Olimpiadasi uchun asosiy tarkibi ochiqlandi
Samarqandda o‘tkaziladigan 46-Butunjahon shaxmat olimpiadasining Open yo‘nalishida O‘zbekiston sharafini himoya qiladigan asosiy terma jamoa tarkibi ma’lum bo‘ldi. Jamoa 2022-yilda Chennayda oltin medalni qo‘lga kiritgan tarkibga deyarli mos keladi. Bu haqda mamlakat Shaxmat federatsiyasi xabar berdi.
Sindarov va Abdusattorov boshchiligidagi tarkib
O‘zbekiston-1 terma jamoasi quyidagi grossmeysterlardan iborat:
- Javohir Sindarov – 2 778;
- Nodirbek Abdusattorov – 2 762;
- Nodirbek Yoqubboyev – 2 685;
- Shamsiddin Vohidov – 2 654;
- Muhiddin Madaminov – 2 611.
Jamoaga grossmeyster Rustam Qosimjonov murabbiy-kapitanlik qiladi.
Chempionlar tarkibida bitta o‘zgarish
O‘zbekiston terma jamoasining mazkur tarkibi 2022-yilda Hindistonning Chennay shahrida o‘tkazilgan Butunjahon shaxmat olimpiadasida oltin medalni qo‘lga kiritgan jamoaga deyarli mos keladi.
Bu safargi yagona o‘zgarish – Jahongir Vohidov o‘rniga yosh grossmeyster Muhiddin Madaminov tarkibga kiritilgan.
O‘zbekiston-1 jamoasi Samarqanddagi olimpiadada o‘z maydonida amaldagi chempionlik maqomini himoya qiladi.
Avvalroq grossmeyster Javohir Sindarov amaldagi jahon chempioni Gukesh bilan 2026-yilgi FIDE jahon chempionligi uchun dona surishi haqida xabar berilgandi. Uchrashuvning umumiy mukofot jamg‘armasi $2,5 mlnni tashkil etadi.
