Samsung kompaniyasi Yevropa bozorida yangi budjet smartfoni Samsung Galaxy A18 4G modelini taqdim etdi. Bu haqda GSMArena nashri xabar bermoqda.
Yangi model Galaxy A17 4G o‘rnini egallaydi, biroq boshlang‘ich narxi sezilarli darajada yuqori. Fransiyada 4/128 GB xotirali versiya 280 yevroga baholangan. Galaxy A17 4G esa Yevropada 6/128 GB konfiguratsiyada 200 yevrodan sotuvga chiqqan edi.
Galaxy A18 yangi Exynos protsessorini oldi
Galaxy A18 4G’ning asosiy yangiliklaridan biri protsessor bo‘ldi. Avvalgi avloddagi MediaTek Helio G99 o‘rniga Samsung Exynos 1610 platformasi qo‘llanilgan.
Qayd etilishicha, Exynos 1610 protsessorining o‘zi hozircha alohida rasman taqdim etilmagan.
Smartfon 6,7 dyuymli Super AMOLED displey bilan jihozlangan. Ekran o‘lchamlari 2340 × 1080 pikselni, yangilanish chastotasi esa 90 Hz’ni tashkil etadi.
Asosiy kamera 50 MP
Galaxy A18 4G old tomonida tomchisimon kesikka joylashtirilgan 13 MP selfi kamerasi mavjud.
Orqa panelda ikkita kamera o‘rnatilgan. Asosiy sensor 50 MP, ikkinchi modul esa 2 MP aniqlikka ega. Smartfonda optik tasvir barqarorlashtirish tizimi mavjud emas.
Video yozishning maksimal sifati Full HD va soniyasiga 30 kadrni tashkil qiladi.
5000 mA/soat batareya va 25 Vt quvvatlash
Samsung Galaxy A18 4G 5000 mA/soat sig‘imli akkumulyator bilan jihozlangan. U 25 Vt quvvatdagi tezkor quvvatlashni qo‘llab-quvvatlaydi.
Ishlab chiqaruvchi batareya resursini 1200 ta quvvatlash sikli deb ko‘rsatgan. Smartfon korpusining qalinligi 7,7 mm, og‘irligi esa 196 grammni tashkil qiladi.
Suv va changdan himoya kuchaytirildi
Galaxy A18 4G’da himoya darajasi avvalgi Galaxy A17’dagi IP54’dan IP64’gacha oshirilgan. Bu smartfonning changdan yaxshiroq himoyalanishi va suv sachrashlariga chidamliligini anglatadi.
Qurilma Android 17 operatsion tizimi hamda One UI 9 interfeysi bilan sotuvga chiqadi. Samsung smartfon uchun olti yil davomida Android yangilanishlari va xavfsizlik patchlarini taqdim etishni va’da qilmoqda.
Avvalroq «Kursiv» Samsung Galaxy A08 smartfoni taqdim etilgani haqida yozgan edi.
