Samsung Apple bilan DRAM va NAND xotira chiplarining narxlarini qayta kelishib olgani va 2027-yildan boshlab ushbu komponentlar uchun yuqoriroq narx belgilagani aytilmoqda. Bu haqda Sammobile ma’lum qildi.
Agar ma’lumot tasdiqlansa, bu iPhone, iPad, MacBook, Mac va boshqa Apple qurilmalarining ishlab chiqarish xarajatlarini oshirishi mumkin. Natijada kompaniya ayrim mahsulotlar narxini yana ko‘tarishi ehtimoli mavjud.
RAM narxi 33% ga oshishi mumkin
Xabarga ko‘ra, Apple 2027-yilning birinchi choragidan boshlab LPDDR5X operativ xotirasi uchun 1 gigabitga $2, NAND flash xotirasi uchun esa $0,33 to‘lashi mumkin.
Taqqoslash uchun, 2026-yilning uchinchi choragida LPDDR5X narxi 1 gigabit uchun $1,50, NAND flash esa $0,26 bo‘lgan.
Shu tariqa, RAM narxi bir necha oy ichida qariyb 33%, xotira chiplariniki esa 27% ga oshishi mumkin.
Apple qurilmalarining tannarxi oshadi
Xotira chiplari iPhone va boshqa elektronika qurilmalarining asosiy komponentlaridan biri hisoblanadi. Ularning narxi oshishi mahsulot tannarxiga bevosita ta’sir qiladi.
Apple yaqinda iPhone 18 Pro va iPhone 18 Pro Max narxini AQShda avvalgi avlodga nisbatan $100 ga oshirgan edi. Boshqa ayrim bozorlarda narx o‘sishi bundan ham yuqori bo‘lgan.
Agar Samsung bilan yangi narxlar bo‘yicha kelishuv haqidagi ma’lumot to‘g‘ri bo‘lsa, keyingi Apple qurilmalari yanada qimmatlashishi mumkin.
Boshqa ishlab chiqaruvchilarga ham ta’sir qilishi mumkin
Apple smartfon va kompyuter bozori uchun xotira chiplarini eng katta hajmda xarid qiluvchi kompaniyalardan biri sanaladi. Shu sababli u yetkazib beruvchilar bilan muzokaralarda boshqa ko‘plab brendlarga qaraganda kuchliroq pozitsiyaga ega.
Avvalroq «Kursiv» Samsung Galaxy A36 uchun One UI 9.0’ning ikkinchi beta-versiyasi chiqqani haqida yozgan edi.
