Ukraina prezidenti ofisi maslahatchisi Mixail Podolyak FIDE prezidentligiga nomzod Timur Turlovning taklifini qabul qildi. Podolyak Turlov saylovda g‘alaba qozonsa, uning jamoasida FIDE vitse-prezidenti sifatida ishlashga tayyorligini bildirdi. Bu haqda Kursiv Kazakhstan xabar berdi.
Turlov Ukraina vakilini FIDE rahbariyatiga taklif qildi
Freedom Holding Corp. rahbari va FIDE prezidentligiga nomzod Timur Turlov X ijtimoiy tarmog‘ida Mixail Podolyakka ochiq murojaat bilan chiqdi.
Turlov Ukraina jahon shaxmatidagi muhim mamlakatlardan biri ekanini ta’kidlab, ukrainalik vakil FIDE rahbariyatida bevosita ishtirok etishi kerakligini bildirdi. U Ukraina tomonidan vitse-prezident lavozimiga nomzod ko‘rsatishni taklif qildi.
Turlovning fikricha, xalqaro shaxmat federatsiyasi dunyoda yuz berayotgan jarayonlardan butunlay chetda qolmasligi kerak. Shu sabab Ukraina shaxmat hamjamiyatining FIDE doirasidagi muhim qarorlarni muhokama qilish va qabul qilishda o‘z ovoziga ega bo‘lishi zarur.
Podolyak taklifni qabul qildi
Mixail Podolyak Turlov bilan avval ham dastlabki muzokaralar o‘tkazilganini tasdiqladi va taklifga rozilik bildirdi.
U xalqaro sport federatsiyalarida siyosiy intriga va ichki kurashlar kamayib, asosiy e’tibor halol raqobat, gumanizm va sportning fundamental qadriyatlariga qaratilishi kerakligini aytdi. Podolyak, shuningdek, Ukraina ovozi xalqaro sport tashkilotlarida muntazam eshitilib turishini muhim deb hisoblashini bildirdi.
FIDE prezidentligi uchun saylov 26-sentabrda bo‘ladi
FIDE prezidentligi uchun saylov 26-sentabr kuni Samarqandda, tashkilot Bosh assambleyasi doirasida o‘tkaziladi.
Rasmiy ro‘yxatdan uchta nomzodlik tandemi o‘tgan: Timur Turlov besh karra jahon chempioni Vishvanatan Anand bilan, Yan-Xenrik Byuttner Malkolm Pein bilan va Vadim Rozenshteyn Gordon Tang bilan qatnashmoqda. Har bir ovoz berish huquqiga ega milliy federatsiya bitta ovozga ega.
Turlov FIDE uchun $6 mlnlik fond taklif qilgan
Sentabr oyida o‘tkazilgan nomzodlar debatida Turlov kichik va rivojlanayotgan milliy federatsiyalarni qo‘llab-quvvatlash uchun $6 mln dan ortiq mablag‘ga ega maxsus rivojlanish fondini tashkil etishni taklif qilgan.
Ushbu mablag‘ ochiq turnirlarni o‘tkazish, hakamlar va murabbiylarni tayyorlash, shaxmatchilarning xorijiy musobaqalarda ishtirokini qo‘llab-quvvatlash kabi yo‘nalishlarga sarflanishi rejalashtirilgan.
Avvalroq Kursiv Uzbekistan FIDE Javohir Sindarov g‘alabasini e’tirof etgani haqida yozgan edi.
