46-Butunjahon shaxmat Olimpiadasining yettinchi turida O‘zbekiston erkaklar terma jamoasi Xitoyni 3:1 hisobida mag‘lub etdi. Mezbonlar ochiq bo‘limdagi yakka peshqadamligini saqlab qoldi va eng yaqin ta’qibchilaridan ikki jamoaviy ochkoga o‘zib ketdi.
O‘zbekiston oq donalarda o‘ynagan birinchi va uchinchi doskalarda g‘alaba qozondi, qolgan ikki partiya durang bilan yakunlandi.
Abdusattorov Ding Lirenni mag‘lub etdi
Birinchi doskada Nodirbek Abdusattorov sobiq jahon chempioni Ding Lirendan ustun keldi. Bu xitoylik grossmeysterning ushbu Olimpiadadagi ilk mag‘lubiyati bo‘ldi.
Abdusattorov yetti turdan keyin 5,5 ochko jamg‘ardi. FIDE uning g‘alabasida debyutga puxta tayyorgarlik va vaqt bo‘yicha katta ustunlik muhim rol o‘ynaganini qayd etdi.
Nodirbek Yoqubboyev esa Yu Yangyini murakkab endshpilda mag‘lub etdi. Bu o‘zbekistonlik shaxmatchining so‘nggi olti partiyadagi beshinchi g‘alabasi bo‘ldi.
Yettinchi turdan so‘ng O‘zbekiston eng yaqin ta’qibchilaridan ikki jamoaviy ochko oldinda bormoqda. Musobaqa yakuniga to‘rt tur qoldi.
AQSh Armanistonni yenga olmadi
O‘zbekistonning ta’qibchilaridan biri Armaniston AQSh bilan 2:2 hisobida durang o‘ynadi. Hindiston esa Angliyani 2,5:1,5 hisobida mag‘lub etib, yuqori o‘rinlar uchun kurashni davom ettirdi. Jahon chempioni Gukesh Dommaraju yetti partiyadan olti ochko jamg‘ardi.
Germaniya Turkiyani 3:1, Niderlandiya Bolgariyani 3,5:0,5 hisobida yengdi. Ozarbayjon ham Gretsiya ustidan 3,5:0,5 hisobida g‘alaba qozondi.
O‘zbekiston ayollar terma jamoasi Sloveniyani yengdi
Ayollar bahsida O‘zbekiston Sloveniyani 3,5:0,5 hisobida mag‘lub etib, avvalgi turdagi mag‘lubiyatdan so‘ng g‘alabali yo‘lga qaytdi. Birinchi doskada Afruza Hamdamova Laura Unukdan ustun keldi.
Peshqadam Xitoy va Qozog‘iston terma jamoalarining o‘zaro uchrashuvi 2:2 hisobida yakunlandi. Hindiston Germaniyani 3,5:0,5, Gruziya Polshani 2,5:1,5 hisobida mag‘lub qildi. Bolgariya esa turning kutilmagan natijalaridan birini qayd etib, Ukrainani 3:1 hisobida yengdi.
Avvalroq «Kursiv» O‘zbekiston erkaklar terma jamoasi oltinchi turda Hindistonni 2,5:1,5 hisobida mag‘lub etib, turnirda yakka peshqadamga aylangani haqida xabar bergan edi.
