Saida Mirziyoyeva BAA prezidenti bilan uchrashdi

Prezident administratsiyasi rahbari Saida Mirziyoyeva Abu-Dabida Birlashgan Arab Amirliklari prezidenti shayx Muhammad bin Zoid Ol Nahayon bilan uchrashdi. Bu haqda u o‘zining Telegram-kanalida ma’lum qildi.

Savdo-iqtisodiy hamkorlik muhokama qilindi

Saida Mirziyoyeva uchrashuv davomida BAA prezidentiga O‘zbekiston Prezidenti Shavkat Mirziyoyevning samimiy tilaklarini yetkazganini bildirdi.

Muloqot chog‘ida O‘zbekiston va Birlashgan Arab Amirliklari o‘rtasidagi savdo-iqtisodiy munosabatlarni yanada kengaytirish masalalari muhokama qilindi.

Sun’iy intellekt masalasiga ham e’tibor qaratildi

Tomonlar, shuningdek, sun’iy intellektni rivojlantirish mavzusiga to‘xtalib o‘tdi. Mirziyoyeva BAA rahbari bilan uchrashuvni o‘zi uchun katta sharaf deb atadi hamda ko‘rsatilgan ehtirom uchun minnatdorlik bildirdi.

Avvalroq Kursiv Uzbekistan nashri Saida Mirziyoyeva Namangandagi 5 yoshli qiz bilan bog‘liq holatga munosabat bildirgani haqida yozgan edi.