Pokiston Afg‘onistonga yana aviazarbalar berdi

Pokiston 1-oktabrga o‘tar kechasi Afg‘onistonning Kunar va Hilmand viloyatlariga aviazarbalar berdi. Afg‘oniston tomoni 9 nafar tinch aholi, jumladan, ayollar va bolalar halok bo‘lgani, yana 11 kishi yaralanganini ma’lum qildi. Pokiston esa zarbalar jangarilar yashiringan joylarga berilganini va 22 jangari o‘ldirilganini bildirdi. Tomonlarning qurbonlar haqidagi ma’lumotlari hozircha mustaqil tasdiqlanmagan.

Afg‘oniston uchta uy vayron bo‘lganini bildirdi

Afg‘oniston hukumati matbuot kotibi Zabihulloh Mujohidning aytishicha, Kunar va Hilmand viloyatlaridagi uchta turarjoyga zarba berilgan. Uning bayonotiga ko‘ra, hujumlar oqibatida 9 nafar tinch aholi halok bo‘lgan, 11 kishi jarohatlangan.

Mujohid hujumlarni qoralab, ularni tajovuzkorlik va qabul qilingan tamoyillarning buzilishi deb atagan.

Pokiston zarbalar jangarilarga qaratilganini aytdi

Pokiston Axborot vazirligi esa aviazarbalar ikki hududdagi jangarilar yashiringan joylarga qaratilganini ma’lum qilgan. Vazirlikning dastlabki ma’lumotlariga ko‘ra, hujumlarda 22 jangari o‘ldirilgan. Pokiston tinch aholi orasida qurbonlar bo‘lganini rad etgan.

Reuters ma’lumotiga ko‘ra, Pokiston harbiylari hodisa yuzasidan darhol izoh bermagan. Agentlik Afg‘oniston tomoni bergan ma’lumotlarni mustaqil tasdiqlay olmagan.

Ikki davlat o‘rtasidagi keskinlik davom etmoqda

Pokiston va Afg‘oniston o‘rtasidagi munosabatlar qurolli guruhlar masalasi sabab keskinlashib kelmoqda. Islomobod Afg‘oniston hududida Pokiston hududiga hujum qiluvchi jangarilar yashiringanini ta’kidlaydi. Kobul esa bu ayblovlarni rad etib kelmoqda.

Avvalroq tomonlar o‘rtasidagi to‘qnashuvlarda Qatar, Turkiya va boshqa vositachilar ishtirokida sulhga erishilgan bo‘lsa-da, chegara hududlaridagi keskinlik qayta kuchaygan.

Avvalroq Pokiston 23-sentabr kuni Afg‘onistondan uchirilgan dronlar hujumiga javoban qo‘shni davlat hududidagi 10 ta obyektga havo va dron zarbalari berganini ma’lum qilgandi.