Xiaomi Hindistonda Redmi 17C 5G smartfonini taqdim etdi. Model avvalroq avgust oyida Singapurda namoyish etilgan edi.
Yangi qurilmaning asosiy jihatlari 6,9 dyuymli katta ekran, 6 000 mA/soat sig‘imli batareya va 5G tarmoqlarini qo‘llab-quvvatlashidir.
120 Hz yangilanish tezligiga ega ekran
Redmi 17C 5G 6,9 dyuymli LCD ekran bilan jihozlangan. Displey 1600 × 720 piksel HD+ aniqlik va 120 Hz adaptiv yangilanish tezligini qo‘llab-quvvatlaydi.
Shuningdek, ekran DC Dimming texnologiyasiga ega hamda TÜV Rheinland ko‘zlarni himoya qilish sertifikatlarini olgan.
Dimensity 6300 protsessori o‘rnatilgan
Smartfon MediaTek Dimensity 6300 protsessorida ishlaydi. Chip 6 nm texnologik jarayon asosida ishlab chiqarilgan va 5G tarmoqlarini qo‘llab-quvvatlaydi.
Qurilma 4 yoki 6 Gb tezkor xotira va 128 Gb ichki xotira bilan taklif etiladi. Bundan tashqari, 1 Tb gacha microSD xotira kartasini o‘rnatish mumkin.
6 000 mA/soat batareya
Redmi 17C 5G 6 000 mA/soat sig‘imli batareyaga ega. Xiaomi ma’lumotiga ko‘ra, akkumulyator 1 000 ta quvvatlash siklidan keyin ham dastlabki sig‘imining kamida 80%ini saqlab qolishi kerak.
Smartfon 33 Vt tezkor quvvatlashni qo‘llab-quvvatlaydi. Tegishli adapter qutiga qo‘shib beriladi. Shuningdek, 10 Vt teskari simli quvvatlash funksiyasi ham mavjud.
Asosiy kamera 50 Mp
Smartfonning orqa qismida 50 Mp asosiy kamera va qo‘shimcha yordamchi sensor joylashgan.
Old kamera 8 Mp aniqlikka ega. Old va orqa kameralar 1080p formatda soniyasiga 30 kadr tezlikda video yozishi mumkin.
HyperOS 3 va sun’iy intellekt funksiyalari
Redmi 17C 5G HyperOS 3 operatsion tizimida ishlaydi. Tizim Google Gemini Live, Circle to Search hamda tasvir yaratishga oid ayrim sun’iy intellekt funksiyalarini qo‘llab-quvvatlaydi.
Smartfon korpusining qalinligi 7,99 mm, og‘irligi esa 211 grammni tashkil etadi. Qurilma IP64 darajasida chang va suv sachrashidan himoyalangan.
Yon tomonda barmoq izi skaneri, 3,5 mm audio port va nam qo‘lda ham ekran boshqaruvini yaxshilaydigan Wet Touch texnologiyasi mavjud.
Narxi
Redmi 17C 5G Hindistonda 7-oktabrdan sotuvga chiqadi. 4 Gb tezkor xotirali versiya 20 999 rupiy ($219), 6 Gb tezkor xotirali variant esa 22 999 rupiy ($239) turadi.
Model Dark Night, Purple Dawn va Coffee Brew ranglarida taklif etiladi. Coffee Brew versiyasi sun’iy charmga o‘xshash teksturali orqa panelga ega.
Avvalroq Kursiv Uzbekistan nashri Redmi 17 5G global versiyasi haqida yozgan edi.
