Yangilangan Honda Civic Type R 2027 taqdim etildi
AQSh bozori uchun yaxshilangan osma, yangi shassi va 319 ot kuchiga ega 2027-yilgi Honda Civic Type R modeli rasman namoyish etildi. Bu haqda Carscoops nashri xabar berdi.
Dizayn va qulayliklar
Xetchbek o‘zining 2,0 litrli turbodvigatelini saqlab qolgan holda, yanada tajovuzkor old bamper va yirik splitter bilan jihozlandi. Honda vakillarining ta’kidlashicha, ushbu o‘zgarishlar old o‘qdagi bosim kuchini oshiradi. Shuningdek, «+R» sport rejimida amortizatorlar oddiy yo‘llarda qulayroq harakatlanish uchun qayta sozlandi.
Tormoz va quvvat tizimi
Avtomobilning tormoz mexanizmiga erkin harakatni kamaytiruvchi maxsus prujina o‘rnatildi hamda pastki vitesga o‘tishda avtomatik qayta gaz berish tizimi tezlashtirildi. Civic Type R 319 ot kuchi va 420 N·m aylanuvchi momentga ega bo‘lib, harakatni olti pog‘onali «mexanika» orqali old g‘ildiraklarga uzatadi. U 97 km/soat tezlikka taxminan besh soniyada erishadi.
Qo‘shimcha jihozlar va narx o‘zgarishi
Type R modeli uchun endi sport o‘rindiqlarini uch bosqichli isitish tizimi standart paketga kiritildi va multimediya tizimiga Google hamda Amazon Alexa xizmatlari qo‘shildi. Avtomobil narxi yetkazib berish xarajatlari bilan birga $49,9 ming etib belgilandi. Bu 2026-yilgi modelning narxiga ($48,6 ming) nisbatan $1,3 mingga qimmatroqdir.
Avvalroq Kursiv nashri Honda CR-V qachon ishlab chiqarilishi ma’lum bo‘lgani haqida xabar bergan edi.
