Ortda qolayotgan haftada nimalar yuz berdi
Kursiv Uzbekistan mahalliy va xalqaro maydonda hafta davomida sodir bo‘lgan yangiliklarning eng muhimlarini bir joyga jamladi.
Javohir Sindarov Samarqanddagi olimpiadadan qancha pul ishlab topdi
O‘zbekiston terma jamoasi Samarqandda o‘tgan 46-Butunjahon shaxmat olimpiadasida oltin medalni qo‘lga kiritdi. Jamoa tarkibida ishtirok etgan Javohir Sindarov ushbu natija uchun $200 ming miqdorida bir martalik davlat mukofotiga ega bo‘ladi. Bu haqda 21-sentabrda qabul qilingan Prezidentning PQ–346-son qarorida so‘z boradi.
O‘zbekiston 27-sentabr kuni olimpiadaning so‘nggi turida Ukrainani 2,5:1,5 hisobida mag‘lub etib, ochiq turnir g‘olibiga aylandi. Bu O‘zbekiston terma jamoasining Butunjahon shaxmat olimpiadalaridagi ikkinchi chempionligi bo‘ldi. Birinchi oltin medal 2022-yilda Chennayda qo‘lga kiritilgan edi.
Pensiya hisoblash tartibi o‘zgarsa, pensiya miqdori qanday bo‘ladi
Davlat pensiya ta’minoti tizimini isloh qilish konsepsiyasi loyihasida pensiyani hisoblashda inobatga olinadigan ish haqi davrini amaldagi besh yildan bosqichma-bosqich 20 yilgacha uzaytirish taklif etilmoqda.
Pensiya jamg‘armasi direktor o‘rinbosari Nuriddin Shadixodjayevning aytishicha, amaldagi va taklif etilayotgan tartib bo‘yicha pensiya miqdorlari real fuqarolar misolida solishtirilgan. Bu haqda pensiya tizimidagi taklif etilayotgan islohotlarga bag‘ishlangan matbuot anjumanida qatnashgan Kursiv Uzbekistan muxbiri xabar berdi.
Ohangarondagi bog‘chada bola hasharotlarga qarshi vositadan zaharlanib vafot etdi
Toshkent viloyatining Ohangaron shahridagi 6-sonli maktabgacha ta’lim tashkilotida 2026-yil 28-avgust kuni 2023-yilda tug‘ilgan tarbiyalanuvchi hasharotlarga qarshi ishlatiladigan vositani ichib qo‘ygan. Bola shifoxonaga olib borilgan, biroq shifokorlar uning hayotini saqlab qola olmagan. Bu haqda Toshkent viloyati Maktabgacha va maktab ta’limi boshqarmasi rasmiy munosabat bildirdi.
Sindarov, Abdusattorov va Madaminov: shaxmat olimpiadasi g‘oliblari davlat mukofotlari bilan taqdirlandi
Prezident Shavkat Mirziyoyev Samarqandda o‘tgan 46-Butunjahon shaxmat olimpiadasi va 3-Parashaxmat olimpiadasi g‘oliblari hamda ishtirokchilarini davlat mukofotlari bilan taqdirlash to‘g‘risidagi farmonni imzoladi.
Unga ko‘ra, shaxmatchilar, murabbiylar va federatsiya vakillari faxriy unvonlar, orden va medallar bilan taqdirlandi.
Oktabrda harorat 2 daraja sovuqqacha tushishi mumkin
2026-yil oktabr oyi O‘zbekistonda beqaror ob-havo bilan boshlanadi. Oy davomida iliq va salqin davrlar almashib turishi, shimoliy hududlarda ayrim paytlarda tungi harorat 0–2 daraja sovuqqacha pasayishi mumkin.
«O‘zgidromet» xabariga ko‘ra, oktabrda o‘rtacha oylik havo harorati iqlimiy me’yor atrofida, ayrim hududlarda esa undan yuqori bo‘lishi kutilmoqda. Yog‘ingarchilik esa hududlar bo‘yicha notekis taqsimlanadi.
MyGov orqali bank kartalarini ko‘rish va yangisiga buyurtma berish xizmati ishga tushdi
My.gov.uz portalida bank kartalari bilan bog‘liq yangi imkoniyatlar ishga tushirilmoqda. Foydalanuvchilar o‘z nomiga rasmiylashtirilgan kartalar haqida ma’lumot olishi, ayrim hollarda ularni boshqarishi va yangi bank kartasiga onlayn buyurtma berishi mumkin.
Senat umrbod qamoq jazosini ma’qulladi
Oliy Majlis Senati 2-oktabr kuni bolalarni zo‘ravonlikning barcha shakllaridan himoya qilishga qaratilgan qonunni ma’qulladi. Hujjat 14 yoshga to‘lmagan bolalarga nisbatan jinsiy jinoyatlar uchun 25 yilgacha yoki umrbod ozodlikdan mahrum qilish jazosini belgilashni nazarda tutadi. Qonun endilikda prezident imzosiga yuboriladi.
«Onam meni bolalar uyiga olib borib, o‘sha yerda qoldirgan» — Maryam Tillayeva onasi bilan munosabati haqida
O‘zbekiston birinchi prezidenti Islom Karimovning nabirasi Maryam Tillayeva jurnalist Nadejda Strelesga bergan intervyusida onasi Lola Karimova bilan murakkab munosabatlari haqida gapirdi. Uning aytishicha, bolaligida onasi uni bolalar uyiga olib borib, o‘sha yerda qoldirgan holatlar bo‘lgan.
Tillayevaning so‘zlariga ko‘ra, bu voqealar uning onasi bilan munosabatlariga kuchli ta’sir ko‘rsatgan.
Portugaliyada Ronaldu o‘rniga yangi «7» paydo bo‘ldi
Krishtianu Ronaldu Portugaliya terma jamoasi yig‘inini tark etganidan keyin uning mashhur 7-raqami Rafael Leaoga berildi. «Galatasaroy» futbolchisi bu raqamda Daniyaga qarshi o‘yinda maydonga tushdi. Bu haqda RTP xabar berdi.
UEFAning Daniya – Portugaliya uchrashuvi uchun e’lon qilingan rasmiy tarkibida Rafael Leao 7-raqam bilan qayd etilgan. Avval u terma jamoada 17-raqamda o‘ynab kelgan.
Javohir Sindarov qachon uylanadi — tafsilotlar
O‘zbekistonlik grossmeyster Javohir Sindarov shaxmat bo‘yicha Jahon olimpiadasidagi g‘alabadan so‘ng kelajakdagi rejalari haqida gapirdi. U to‘y haqidagi savolga hazil aralash javob berib, avval jahon tojini qo‘lga kiritishni maqsad qilganini aytdi.
«To‘y oldidan jahon tojini olish kerak», – dedi Sindarov.
Grossmeyster taqdirlash marosimidan keyingi taassurotlari bilan ham o‘rtoqlashdi.
O‘zbekistonning tashqi qarzi 84 mlrd dollardan oshdi
O‘zbekistonning jami tashqi qarzi 2026-yilning birinchi yarmida 1,9 mlrd dollarga oshib, 84,1 mlrd dollarga yetdi. Bir yil ichida tashqi qarz qariyb 12 mlrd dollarga yoki 16,5 foizga ko‘paygan. Bu haqda Markaziy bankning to‘lov balansi va tashqi qarz bo‘yicha hisobotida ma’lum qilindi.
Jami tashqi qarzning 41,7 mlrd dollari davlat sektori, 42,4 mlrd dollari esa korporativ sektor hissasiga to‘g‘ri keladi.
Olimpiadada kumush medal olgan Qozog‘iston shaxmatchilari mukofotsiz qoldi
Qozog‘iston ayollar terma jamoasi a’zolariga Samarqandda bo‘lib o‘tgan 46-Butunjahon shaxmat olimpiadasida qo‘lga kiritilgan kumush medal uchun davlat mukofot pullari to‘lab berilmadi. Bu haqda shaxmatchi Alua Nurman o‘zining Instagram sahifasida ma’lum qildi.
Qozog‘iston ayollar terma jamoasi a’zosi Alua Nurmanning so‘zlariga ko‘ra, Almati shahridagi Sport direksiyasi va Oliy sport mahorati maktabi xodimlari shaxmatchilarga ushbu natija uchun davlat mukofoti berilmasligini ma’lum qilgan. Shuningdek, olimpiadadagi muvaffaqiyat sportchilarga oylik maosh tayinlash uchun ham asos bo‘la olmasligi ta’kidlangan.
O‘gay onaning kaltaklashi oqibatida 3 yoshli qizaloq vafot etdi
Qashqadaryo viloyatining Kasbi tumanida o‘gay ona bilan yuzaga kelgan nizo oqibatida 2022-yilda tug‘ilgan qizaloq og‘ir tan jarohatlari olib vafot etdi. Bu haqda Bolalar ombudsmani xabar bermoqda.
Joriy yilning 26-sentabr kuni Qashqadaryo viloyati Kasbi tumanida istiqomat qiluvchi ayol (1994-yilda tug‘ilgan) va uning turmush o‘rtog‘i (1988-yilda tug‘ilgan) o‘rtasida kelishmovchilik yuzaga kelgan. Natijada ayol turmush o‘rtog‘ining qizini (2022-yilda tug‘ilgan) urib, uning bosh qismiga jiddiy shikast yetkazgan. Oqibatda qizaloqning sog‘lig‘i keskin yomonlashib, o‘sha kunning o‘zida vafot etgan.
Maktab va Oliy ta’lim vazirliklari birlashtirilib, Ta’lim va ilm-fan vazirligi tashkil etildi
O‘zbekiston Respublikasi Prezidentining farmoni bilan Maktabgacha va maktab ta’limi vazirligi hamda Oliy ta’lim, fan va innovatsiyalar vazirligi yagona Ta’lim va ilm-fan vazirligi sifatida tashkil etildi. Bu haqda Prezident matbuot xizmati xabar berdi.
Zafar Hoshimov Prezident Administratsiyasidagi huzuridagi maxsus ishchi guruhga rahbarlik qiladi
Prezident Administratsiyasi huzurida Inson kapitalini rivojlantirish va uzluksiz ta’lim strategiyasi bo‘yicha maxsus ishchi guruh tashkil qilinmoqda va unga jamoatchilik asosida tadbirkor Zafar Hoshimov rahbar etib tayinlandi. Bu haqda Prezident matbuot markazi xabar berdi.
