Mirziyoyev Markaziy Osiyo uchun umumiy SI infratuzilmasini yaratishni taklif qildi
O‘zbekiston prezidenti Shavkat Mirziyoyev Markaziy Osiyo davlatlari imkoniyatlarini birlashtirib, o‘zaro bog‘langan milliy ma’lumotlar markazlari asosida umumiy hisoblash infratuzilmasini yaratishni taklif qildi. Bu haqda O‘zbekiston yetakchisining matbuot xizmati xabar berdi.
Markaziy Osiyo uchun yagona hisoblash infratuzilmasi
8-oktabr kuni Turkmanistonning «Avaza» milliy sayyohlik zonasida Markaziy Osiyo va Ozarbayjon davlat rahbarlarining sakkizinchi Maslahat uchrashuvi bo‘lib o‘tdi. Shavkat Mirziyoyev sammitda sun’iy intellekt va katta hajmdagi ma’lumotlar allaqachon sanoat, transport, energetika, qishloq xo‘jaligi, ta’lim va davlat boshqaruvini o‘zgartirayotganini ta’kidladi.
«Iqtisodiyotlarimizning unumdorligi va kelajakda raqobatlasha olishi ko‘p jihatdan shu texnologiyalarga bog‘liq bo‘ladi», – dedi prezident.
Shu sababli u mintaqa mamlakatlari imkoniyatlarini birlashtirishni va o‘zaro bog‘langan milliy ma’lumotlar markazlari tarmog‘iga asoslangan umumiy hisoblash infratuzilmasini yaratishni boshlashni taklif qildi.
Bunday tizim hisoblash quvvatlaridan samaraliroq foydalanish va sun’iy intellekt sohasidagi yirik loyihalarni amalga oshirish uchun imkoniyat yaratishi mumkin.
Mintaqaga qanday mutaxassislar kerakligi aniqlanadi
Prezident texnologik infratuzilmaning o‘zi yetarli emasligini, mintaqaga malakali mutaxassislar ham zarurligini ta’kidladi. Shu munosabat bilan talab yuqori bo‘lgan kasblar va kompetensiyalarning mintaqaviy atlasini ishlab chiqish taklif qilindi.
Unda ayni paytda mutaxassislar yetishmayotgan hamda yaqin yillarda ularga talab oshishi kutilayotgan yo‘nalishlar bo‘yicha prognozlar jamlanadi.
Universitetlar iqtisodiyot talabiga moslashadi
Taklif etilayotgan atlas asosida universitetlar va professional ta’lim muassasalari mintaqa iqtisodiyotining kelajakdagi ehtiyojlarini oldindan hisobga olishi mumkin.
Bu orqali sanoat, transport, energetika, raqamli texnologiyalar va boshqa sohalardagi yirik loyihalar uchun zarur kadrlarni oldindan tayyorlash imkoniyati yaratiladi.
Avvalroq Mirziyoyev Markaziy Osiyo va Ozarbayjon davlatlari oddiy savdo bilan cheklanmasdan, qo‘shma mahsulotlar yaratishga o‘tishi kerakligini ta’kidlagandi.
